മദ്യപിച്ച ശേഷം സ്ഥിരമായി ഭാര്യയെ മര്‍ദ്ദിക്കുന്ന യുവാവ് അറസ്റ്റിലായി. അണക്കര പുല്ലുവേലില്‍ ജിഷ്ണുദാസ് എന്ന 27 വയസുള്ള ഉണ്ണിയെ വണ്ടന്‍മേട് പൊലീസാണ് പിടികൂടിയത്. മദ്യപിച്ച് കഴിഞ്ഞാല്‍ കെജിഎഫ് എന്ന സിനിമയിലെ ‘റോക്കി ഭായ്’ ആണ് താനെന്ന് ചമഞ്ഞ് ഭാര്യയെ ഇയാള്‍ സ്ഥിരം മര്‍ദ്ദിക്കുമെന്നാണ് പോലീസിന് ലഭിച്ച പരാതി. റോക്കി ഭായിയെ പോലെ വലിയ മോതിരം ധരിച്ചിരുന്ന യുവാവ് അത് ഉപയോഗിച്ചും ഭാര്യയെ ഉപദ്രവിച്ചിരുന്നു.
ഉപദ്രവിച്ചതിന്റെ പാടുകളും ഭാര്യയുടെ മുഖത്തുണ്ട്. ജെസിബി ഉടമയും ഡ്രൈവറുമായ യുവാവ് കഴിഞ്ഞ 19ന് രാത്രിയിലും മദ്യപിച്ച ശേഷം ഭാര്യയെ തല്ലിയതോടെയാണ് വിവരമറിഞ്ഞു ഭാര്യാപിതാവ് വീട്ടിലെത്തിയത്. അദ്ദേഹത്തിന്‍റെ മുമ്പില്‍ വച്ചും യുവാവ് ഭാര്യയെ മര്‍ദ്ദിച്ചെന്നും കഴുത്തിന് കുത്തിപിടിച്ച് ഉപദ്രവിച്ചെന്നും പരാതിയില്‍ പറയുന്നു. കോടതിയില്‍ ഹാജരാക്കിയ പ്രതി ജിഷ്ണുദാസിനെ റിമാന്‍ഡ് ചെയ്തു.
