മാലിദ്വീപിന്റെ അധികാരം ഏറ്റെടുത്തയുടന്‍ ഇന്ത്യന്‍ സൈന്യത്തെ രാജ്യത്ത് നിന്ന് നീക്കുമെന്ന് നിയുക്ത പ്രസിഡന്റ് മുഹമ്മദ് മുയിസു. താന്‍ സ്ഥാനമേറ്റെടുത്ത് ഒരാഴ്ച്ചയ്ക്കകം തന്നെ ഇന്ത്യന്‍ സൈന്യത്തെ രാജ്യത്ത് നിന്ന് നീക്കാനാണ് ആലോചിക്കുന്നതെന്നും നയതന്ത്ര മാര്‍ഗങ്ങള്‍ ഇതിനായി ഉപയോഗിക്കുമെന്നും മുഹമ്മദ് മുയിസു പറഞ്ഞു. ഒരു അഭിമുഖത്തിലാണ് അദ്ദേഹം ഇക്കാര്യം അറിയിച്ചത്. നവംബര്‍ 17നാണ് മുഹമ്മദ് മുയിസു മാലിദ്വീപ് പ്രസിഡന്റായി സത്യപ്രതിജ്ഞ ചെയ്യുക.
അതേസമയം സൈന്യത്തെ നീക്കുന്ന കാര്യം ഇന്ത്യന്‍ ഹൈ കമ്മിഷണറോട് സംസാരിച്ചിരുന്നതായി മുയിസു പറഞ്ഞു. അദ്ദേഹം വളരെ പോസിറ്റിവായാണ് സംസാരിച്ചതെന്നും ഇരുവർക്കും ഒരുമിച്ചിരുന്ന് ഇക്കാര്യം ചര്‍ച്ച ചെയ്യാമെന്ന് അറിയിച്ചതായും അദ്ദേഹം കൂട്ടിച്ചേർത്തു. മാത്രമല്ല, ദ്വീപിലുള്ള ഇന്ത്യന്‍ സൈനികരുടെ എണ്ണം സംബന്ധിച്ച് തനിക്ക് കൂടുതലായി ഒന്നും അറിയില്ലെന്നും മുഹമ്മദ് മുയിസു അറിയിച്ചു.
തങ്ങള്‍ നൂറ്റാണ്ടുകളായി സമാധാനമുള്ള രാജ്യമായാണ് ജിവിച്ചിരുന്നതെന്നും മുയിസു പറഞ്ഞു. എന്നാൽ ചൈനയുമായി ബന്ധപ്പെട്ട നയത്തെക്കുറിച്ച് ചോദിച്ചപ്പോള്‍ താന്‍ പ്രോ മാലിദ്വീപ് നയമാണ് പിന്തുടരുന്നതെന്നും ഒരു രാജ്യത്തോടും പ്രത്യേക താത്പര്യമില്ലെന്നുമായിരുന്നു മുഹമ്മദ് മുയിസു മറുപടി നൽകിയത്. തങ്ങളെ ബഹുമാനിക്കുന്ന രാജ്യങ്ങളായിരിക്കും സുഹൃത്തുക്കളെന്നും അദ്ദേഹം കൂട്ടിച്ചേര്‍ത്തു.
