തിയ്യറ്ററുകൾ ഇന്ന് ഹൗസ് ഫുൾ ആവും. സിനിമ കാണാൻ തിയ്യറ്ററിലേക്ക് പോകുന്നവർക്ക്‌ വെറും 99 രൂപ മാത്രമേ ടിക്കറ്റിനായി നൽകേണ്ടതുള്ളൂ. ദേശീയ സിനിമാ ദിനമായ ഇന്ന് പ്രേക്ഷകർക്ക് 99 രൂപയ്ക്ക് ഏത് സിനിമയും കാണാനുള്ള സുവർണ്ണാവസരം ഒരുക്കിയിരിക്കുകയാണ് മൾട്ടി പ്ലെക്സ് ആസോസിയേഷൻ ഓഫ് ഇന്ത്യ. രാജ്യത്തൊട്ടാകെയുള്ള നാലായിരത്തിലേറെ സ്ക്രീനുകളിൽ ഈ ഓഫർ ലഭ്യമാകുമെന്നും അസോസിയേഷൻ അറിയിച്ചു. കേരളത്തിലും ഈ ഓഫർ ലഭ്യമാണ്.
ഒക്ടോബര്‍ 13 ന് ഏത് സമയത്തും ഈ ഓഫര്‍ ലഭിക്കും. എന്നാൽ ബുക്കിങ് ആപ്പുകളിലൂടെ ടിക്കറ്റ് എടുക്കുന്നവർക്ക് 99 രൂപയ്ക്ക് പുറമേ അധിക ബുക്കിങ് ചാര്‍ജ് ഉണ്ടായിരിക്കും. അതേസമയം തിയറ്ററുകളിലെ കൗണ്ടറുകളില്‍ 99 രൂപയ്ക്ക് ടിക്കറ്റ് എടുക്കാം. മള്‍ട്ടിപ്ലെക്‌സ് അസോസിയേഷന് കീഴിലുള്ള പിവിആര്‍ ഐനോക്‌സ്, മിറാഷ്, വേവ്, സിനിപോളിസ്, എം2കെ, ഡിലൈറ്റ്, ഏഷ്യന്‍, മൂവി ടൈം, മുക്ത എ 2 തുടങ്ങിയ മള്‍ട്ടിപ്ലെക്‌സ് ശൃംഖലകളിലാണ് ഓഫര്‍ ലഭ്യമാവുക.
അതേസമയം ബുക്ക് മൈ ഷോ, പേടിഎം തുടങ്ങിയ സിനിമ ബുക്കിങ് ആപ്പുകളില്‍ ഓഫര്‍ തുകയ്‌ക്ക് ടിക്കറ്റ് ലഭ്യമായിത്തുടങ്ങിയിട്ടുണ്ട്. എന്നാല്‍ ഐമാക്‌സ്, 4 ഡിഎക്‌സ്, റിക്ലൈനര്‍ തുടങ്ങിയ പ്രീമിയം വിഭാഗങ്ങള്‍ക്ക് ഈ ഓഫര്‍ ലഭിക്കില്ല എന്നും അസോസിയേഷൻ വ്യക്തമാക്കി.
