ഏകദിന ലോകകപ്പിലെ കഴിഞ്ഞ ദിവസം നടന്ന മത്സരത്തിൽ ശ്രീലങ്കയ്ക്കെതിരെ പാക്കിസ്ഥാൻ മിന്നും വിജയം സ്വന്തമാക്കിയിരുന്നു. റെക്കോർഡ് ചേസിങ്ങിൽ പാക്ക് ബാറ്റർ മുഹമ്മദ് റിസ്‌വാന്റെ സെഞ്ചുറി നിർണായക പങ്കുവഹിച്ചിരുന്നു. ഇടയ്ക്ക് ശക്തമായ പേശീവലിവ് ഉണ്ടായെങ്കിലും താരം ബാറ്റിങ് പൂർവാധികം കരുത്തോടെ തുടർന്നു. ഈ വിജയം പാക്കിസ്ഥാനെ പോയിന്റ് പട്ടികയിൽ രണ്ടാം സ്ഥാനത്തേക്ക് ഉയർത്തുകയും ചെയ്തു.
അതേസമയം ഈ വിജയ സെഞ്ചുറി ഗാസയിലെ സഹോദരങ്ങൾക്കായി സമർപ്പിക്കുവെന്ന് പ്രഖ്യാപിച്ചുകൊണ്ടുള്ള റിസ്‌വാന്റെ സമൂഹമാധ്യമത്തിലെ പോസ്റ്റ് ഇതിനോടകം തന്നെ വൈറൽ ആയി കഴിഞ്ഞു. ‘ഇത് ഗാസയിലെ പ്രിയപ്പെട്ട സഹോദരങ്ങൾക്ക്‌ വേണ്ടിയാണ്. വിജയത്തിൽ പങ്കുവഹിക്കാനായതിൽ വലിയ സന്തോഷമുണ്ട്. മുഴുവൻ ടീമും പ്രസംശയർഹിക്കുന്നു. അബ്ദുല്ല ഷഫീഖും ഹസൻ അലിയും ജയം എളുപ്പമാക്കി. മികച്ച പിന്തുണ നൽകിയ ഹൈദരാബാദിലെ കാണികൾക്ക് നന്ദി’ –റിസ്‌വാൻ എക്സിൽ കുറിച്ചു.
കഴിഞ്ഞ ദിവസം നടന്ന മത്സരത്തിൽ രണ്ടിന് 37 എന്ന നിലയിൽ തകർച്ചയുടെ വക്കിലെത്തിയ പാക്കിസ്ഥാനെ ഷഫീഖും റിസ്‌വാനും ചേർന്നാണ് വിജയത്തിലെത്തിച്ചത്. ഇരുവരും ചേര്‍ന്ന് മൂന്നാംവിക്കറ്റിൽ 176 റൺസിന്റെ പാർട്നർഷിപ്പ് സൃഷ്ടിച്ചു. ഷഫീഖ് 113 റൺസ് നേടി പുറത്തായപ്പോൾ റിസ്‌വാൻ 131 റൺസുമായി പുറകിൽ തന്നെ ഉണ്ടായിരുന്നു.
