ഇന്ത്യ- ഓസ്ട്രേലിയ മൂന്നാം ഏകദിന മത്സരത്തിൽ ടീമിൽ തിരിച്ചെത്താനൊരുങ്ങി രോഹിത്തും കോലിയും ബുമ്രയും. ആദ്യ രണ്ട് മത്സരങ്ങളിൽ വിശ്രമം അനുവദിച്ച രോഹിത് ശർമ, വിരാട് കോലി, ഹാർദിക് പാണ്ഡ്യ, കുൽദീപ് യാദവ് എന്നിവരാണ് മൂന്നാം ഏകദിനത്തിൽ ടീമിനൊപ്പമുണ്ടാകുക. ഇവർക്കൊപ്പം ടീമിലെ റൊട്ടേഷൻ പോളിസിയുടെ ഭാഗമായി രണ്ടാം മത്സരത്തിൽ വിശ്രമം അനുവദിച്ചിരുന്ന പേസർ ബുമ്രയും തിരിച്ചെത്തുന്നുണ്ട്. നാളെ രാജ്കോട്ടിലാണ് പരമ്പരയിലെ അവസാന മത്സരം നടക്കുക.
ഈ സാഹചര്യത്തിൽ ഓപ്പണർ ശുഭ്മൻ ഗിൽ, ഓൾ റൗണ്ടർ ഷാർദൂൽ ഠാക്കൂർ എന്നിവർക്ക് വിശ്രമവും അനുവദിക്കും. ഏഷ്യാകപ്പ് ഫൈനലിനിടെ പരുക്കേറ്റ ഓൾ റൗണ്ടർ അക്ഷർ പട്ടേൽ നാളെയും ടീമിലുണ്ടാകില്ല. ഏഷ്യൻ ഗെയിംസ് ടീമിലുള്ള ഋതുരാജ് ഗെയ്ക്വാദ്, മുകേഷ് കുമാർ എന്നിവരെയും മൂന്നാം ഏകദിനത്തിനുള്ള ടീമിൽ നിന്ന് ഒഴിവാക്കിയിട്ടുണ്ട്.
