അബുദാബിയുടെ വില്ലകൾക്ക് വെളിയിൽ പാർക്കിങ് പണിയുന്നവർക്ക് മാർഗ നിർദേശങ്ങളുമായി നഗരസഭ. ആയിരം ദിർഹം ഫീസ് അടച്ച് അനുമതി വാങ്ങിയതിന് ശേഷമായിരിക്കണം പാർക്കിങ് ഷെഡുകൾ പണിയേണ്ടത്.
മുനിസിപ്പാലിറ്റിയുടെ മാർഗ നിർദേശങ്ങൾ
∙ നഗരഭംഗിക്ക് കോട്ടം തട്ടുന്ന രീതിയിലും നിശ്ചയിക്കപ്പെട്ട പരിധിക്കപ്പുറം പാർക്കിങ് ഏരിയ കൂടരുത്.
. പാർക്കിങ് വൃത്തിയാക്കുന്നതിനൊപ്പം അറ്റകുറ്റപ്പണികൾ നടത്തുകയും വേണം. കൂടാതെ മൂന്നാമതൊരാൾക്ക് പാർക്കിങ് ഷെഡുകൾ കൈമാറാനോ വാടകയ്ക്ക് നൽകാനോ പാടുള്ളതല്ല. പാർക്കിങ് മറ്റു കാര്യങ്ങൾക്ക് പ്രയോജനപ്പെടുത്തരുതെന്നും നിർദേശമുണ്ട്.
∙ ഭാവി പദ്ധതികളുടെ ഭാഗമായി ഷെഡ് നീക്കം ചെയ്യാൻ മുനിസിപ്പാലിറ്റി നോട്ടിസ് നൽകിയാൽ കാലതാമസം കൂടാതെ പാർക്കിങ് പൊളിച്ചുനീക്കേണ്ടത് പെർമിറ്റ് ഉടമയുടെ ബാധ്യതയാണ്.
∙ പാർക്കിങ് നിർമാണം കാൽനട യാത്രക്കാർക്കോ സൈക്കിൾ സവാരിക്കാർക്കോ വാഹനങ്ങൾക്കോ മാർഗതടസ്സമാകും വിധമാകരുത്.
∙ സ്ലോട്ടുകൾ ഡ്രൈവർമാരുടെ ദൂര കാഴ്ച നഷ്ടപ്പെടുത്തുന്ന നിലയിലാകരുത്.
. ഷെഡുകളുടെ നിർമാണ ഘടകങ്ങൾ ഒന്നും നഗരസഭയുടെ വൈദ്യുത തൂണുകളുമായി ബന്ധിപ്പിക്കാൻ പാടുള്ളതല്ല.
∙ നടപ്പാതയിൽ നിന്നും രണ്ടര മീറ്റർ കുറയാത്ത നിലയിൽ നിർമിക്കുന്ന ഷെഡുകളുടെ ഉയരം നാലര മീറ്ററിൽ കൂടരുത്. കൂടാതെ വില്ലയുടെ കവാടത്തിന്റെ നിറത്തിനു യോജിക്കുന്ന നിറമാണ് ഷെഡിനും നൽകേണ്ടത്.
∙ ടെഫ്ലോൺ തുണികൾ കൊണ്ടോ യുപി വി സി പോലുള്ളവ ഉപയോഗിച്ചോ ആയിരിക്കണം ഷെഡിന്റെ മേലാപ്പ് പണിയേണ്ടത്.
∙ ഷെഡ് നിർമ്മിക്കുമ്പോൾ തുരുമ്പെടുക്കാത്തതും കാലാവസ്ഥ വ്യതിയാനം മൂലം നശിക്കാത്തതുമായ സാമഗ്രികൾ ഉപയോഗിക്കണം. തീ പിടിത്തം പ്രതിരോധിക്കുന്ന തരത്തിലുള്ളതുമായിരിക്കണം.
∙ നിർമാണ സാമഗ്രികൾ വാങ്ങുന്നതിന് നിലവാരമുള്ള കമ്പനികളെ ആശ്രയിക്കണം. കൂടാതെ പുതിയതും പുതുക്കുന്നതുമായ പാർക്കിങ് പെർമിറ്റുകൾക്ക് മുനിസിപ്പാലിറ്റി ആപ്പ് വഴിയാണ് ഷെഡ് പണിയാൻ അപേക്ഷിക്കേണ്ടത്. പുതിയ പെർമിറ്റിന് 1000 ദിർഹമും പുതുക്കാൻ 200 ദിർഹമുമാണ് നഗരസഭാ നിരക്കായി ഈടാക്കുന്നത്.
