യുവേഫ ചാമ്പ്യൻസ് ലീഗ് ഫുട്ബോൾ ഗ്രൂപ്പ് ഘട്ട മത്സരങ്ങൾ ഇന്ന് ആരംഭിക്കും. നിലവിലെ ചാമ്പ്യൻമാരായ മാഞ്ചസ്റ്റർ സിറ്റി, ആദ്യകിരീടം ലക്ഷ്യമിടുന്ന പിഎസ്ജി, മുൻ ചാമ്പ്യൻമാരായ ബാർസിലോന എന്നിവരെല്ലാം ഇന്ന് കളത്തിൽ ഏറ്റുമുട്ടും. സ്വന്തം മൈതാനത്ത് ജർമൻ ക്ലബ് ബൊറൂസിയ ഡോർട്മുണ്ടാണ് പിഎസ്ജിയുടെ എതിരാളികൾ. നെയ്മാറും ലയണൽ മെസിയും പിഎസ്ജി വിട്ടപ്പോൾ കിലിയൻ എംബപെയാണ് ടീമിന്റെ മുഖം.
മാഞ്ചസ്റ്റർ സിറ്റിക്ക് ആദ്യ മത്സരത്തിൽ എതിരാളികൾ സെർബിയൻ ക്ലബ് റെഡ്സ്റ്റാർ ബൽഗ്രേഡാണ്. മത്സരം സിറ്റിയുടെ മൈതാനമായ ഇത്തിഹാദ് സ്റ്റേഡിയത്തിലാണ്. ബാർസിലോന ബൽജിയൻ ക്ലബ് റോയൽ ആന്റ്വെർപ്പിനെ നേരിടും. എസി മിലാൻ-ന്യൂകാസിൽ, യങ് ബോയ്സ്-ലൈപ്സീഗ്, ഷക്തർ ഡോണസ്ക്-പോർട്ടോ, ലാസിയോ-അത്ലറ്റിക്കോ മഡ്രിഡ്, ഫെയനൂർദ്-സെൽറ്റിക് എന്നിവയാണ് ഇന്നത്തെ മറ്റ് മത്സരങ്ങൾ.
