ഏഷ്യാ കപ്പ് സൂപ്പർ ഫോറിലെ ഇന്ത്യ – പാകിസ്താൻ മത്സരത്തിന് റിസർവ് ഡേ ഉൾപ്പെടുത്തി ഏഷ്യൻ ക്രിക്കറ്റ് കൗൺസിൽ (എസിസി). കാൻഡിയിൽ ഇരുടീമുകളും ഏറ്റുമുട്ടിയ ഗ്രൂപ്പ് മത്സരം മഴ കാരണം ഉപേക്ഷിക്കേണ്ടി വന്നിരുന്നു. ഇതിന്റെ പശ്ചാത്തലത്തിലാണ് എസിസിയുടെ തീരുമാനം. 10-ാം തീയതി കൊളംബോയിലാണ് ഏഷ്യാ കപ്പ് സൂപ്പർ ഫോറിൽ ഇന്ത്യയും പാകിസ്താനും ഏറ്റുമുട്ടുക.
10-ന് നടക്കുന്ന മത്സരം കാലാവസ്ഥ ഉൾപ്പെടെയുള്ള മറ്റെന്തെങ്കിലും കാരണവശാൽ പൂർത്തിയാക്കാൻ സാധിച്ചില്ലെങ്കിൽ 11-നും മത്സരം തുടരും. ഈ മത്സരത്തിന് മാത്രമാണ് എസിസി റിസർവ് ഡേ ഉൾപ്പെടുത്തിയിരിക്കുന്നത്. ഏഷ്യാ കപ്പിൽ മഴ വില്ലനായതോടെ ടൂർണമെന്റിന്റെ സ്ഥലം മാറ്റാനുള്ള ചർച്ചകൾ നടന്നിരുന്നെങ്കിലും എസിസി എടുത്ത തീരുമാനത്തിൽ തന്നെ ഉറച്ചുനിൽക്കുകയായിരുന്നു.
