യുഎഇയിലെ പ്രവാസികൾക്കായി ഏഷ്യാ ലൈവ് അണിയിച്ചൊരുക്കുന്ന ഏഷ്യാ ‘ലൈവ് ഓണം’ സെപ്റ്റംബർ മൂന്നിന് നടക്കും. ദുബായിലെ ഇന്ത്യ ക്ലബ്ബുമായി സഹകരിച്ച് ഊദ് മേത്തയിലാണ് ഓണാഘോഷം സംഘടിപ്പിച്ചിരിക്കുന്നത്.
ഞായറാഴ്ച ഉച്ചക്ക് 12 മണിയോടെയാണ് ആഘോഷ പരിപാടികൾ ആരംഭിക്കുക. ഇന്ത്യ ക്ലബ് കുടുംബാംഗങ്ങളും ഏഷ്യാ ലൈവ് കുടുംബാംഗങ്ങളും ആഘോഷപരിപാടികളുടെ ഭാഗമാകും. വിശിഷ്ടാതിഥികളും ഓണാഘോഷത്തിൽ പങ്കെടുക്കും.
ഓണത്തിൻ്റെ ഐതിഹ്യവും പാരമ്പര്യവും സംസ്കാരവും ചോരാതെയുളള ആഘോഷപരിപാടികളാണ് സംഘടിപ്പിച്ചിട്ടുളളത്. മലയാളികൾക്ക് പുറമെ വിവിധ സംസ്ഥാനങ്ങളിൽ നിന്നുളള ഇന്ത്യ ക്ലബ്ബ് അംഗങ്ങളും കുടുംബസമേതം പങ്കെടുക്കുന്നത് പ്രത്യേകതയാണ്.
പ്രവാസലോകത്താണെങ്കിലും പ്രജകളെ കാണാനെത്തുന്ന മാവേലി ആഘോഷങ്ങൾക്ക് മാറ്റുകൂട്ടും. മാവേലിയെ വരവേറ്റുകൊണ്ടുളള ആഘോഷ ജാഥയോടെയാണ് കലാപരിപാടികൾക്ക് തുടക്കമാവുക. വിഭവസമൃദ്ധമായ ഓണസദ്യയും ഓണക്കളികളും മത്സരങ്ങളും ഏഷ്യാ ‘ലൈവ് ഓണം’ പരിപാടികൾക്ക് കൊഴുപ്പേകും.
