അൽ ഖ്വയ്ദ നേതാവായിരുന്ന ഒസാമ ബിൻ ലാദനെ വധിച്ച യുഎസ് മുൻ നാവിക സേനാംഗം റോബർട്ട് ജെ ഒ’നീൽ അറസ്റ്റിൽ. പൊതുസ്ഥലത്ത് മദ്യപിച്ചതിനും അക്രമം നടത്തിയതിനുമാണ് അറസ്റ്റെന്ന് യു.എസ് മാധ്യമങ്ങൾ റിപ്പോർട്ട് ചെയ്തു. അമേരിക്കയിലെ ടെക്‌സസിലാണ് റോബർട്ട് ഒ’നീൽ അറസ്റ്റിലായത്.
എന്നാൽ അറസ്റ്റ് സംബന്ധിച്ച വിശദാംശങ്ങൾ പുറത്തുവിടാൻ ഫ്രിസ്കോ പൊലീസ് തയ്യാറായില്ല. സംഭവത്തെ കുറിച്ച് 47കാരനായ ഒ’നീലും ഇതുവരെ പ്രതികരിച്ചിട്ടില്ല. അറസ്റ്റിനു പിന്നാലെ 3500 ഡോളറിൻറെ ജാമ്യത്തിൽ റോബർട്ട് ഒ’നീലിനെ വിട്ടയച്ചെന്നാണ് റിപ്പോർട്ട്. റോബർട്ട് ഒ’നീലിന് ഇതിനു മുൻപും നിയമ നടപടികൾ നേരിടേണ്ടിവന്നിട്ടുണ്ട്. 2016ൽ മദ്യപിച്ച് വാഹനം ഓടിച്ചതിന് മോണ്ടാനയിൽ വെച്ച് അദ്ദേഹം അറസ്റ്റിലായിട്ടുണ്ട്. എന്നാൽ പിന്നീട് ഈ കേസ് തള്ളി. 2020ൽ കോവിഡ് വ്യാപനത്തിനിടെ മാസ്ക് ധരിക്കാൻ തയ്യാറാകാതിരുന്നതോടെ ഡെൽറ്റ എയർലൈൻസ് ഒ’നീലിന് യാത്രാവിലക്ക് ഏർപ്പെടുത്തിയിരുന്നു.
2011 മെയ് മാസത്തിൽ പാകിസ്ഥാനിലെ അബോട്ടാബാദിലാണ് ലാദൻ കൊല്ലപ്പെട്ടത്. അമേരിക്ക ഓപ്പറേഷൻ നെപ്ട്യൂൺ സ്പിയർ എന്ന കമാൻഡോ ഓപ്പറേഷനിലൂടെയാണ് ലാദനെ വധിച്ചത്. താനാണ് ലാദനെ വെടിവെച്ചതെന്ന് സംഘത്തിലുണ്ടായിരുന്ന റോബർട്ട് ജെ ഒ’നീൽ അവകാശപ്പെട്ടിരുന്നു. ദി ഓപ്പറേറ്റർ എന്ന പുസ്തകത്തിൽ ഇതു സംബന്ധിച്ച് റോബർട്ട് ഒ’നീൽ വിശദീകരിച്ചിട്ടുണ്ട്. എന്നാൽ ലാദനെ വധിച്ചത് താനാണെന്ന ഒ’നീലിൻറെ അവകാശവാദം അമേരിക്ക പരസ്യമായി അംഗീകരിക്കുകയോ തള്ളിപ്പറയുകയോ ചെയ്തിട്ടില്ല.
