സൗദി അറേബ്യയിൽ കളവുപോയ വാഹനങ്ങളുടെ സർക്കാർ ഫീസും ഗതാഗത പിഴയും സർക്കാർ വഹിക്കും. ജിദ്ദയിൽ സൽമാൻ രാജാവിന്റെ അധ്യക്ഷതയിൽ ചേർന്ന മന്ത്രിസഭാ യോഗത്തിലാണ് പുതിയ തീരുമാനം. മോഷ്ടിക്കപ്പെട്ട വാഹനം കണ്ടെത്തുന്നത് വരെയാണ് ആ വാഹനത്തിന്റെ പേരിൽ വരുന്ന ഫീസും പിഴയും സർക്കാർ വഹിക്കുക. വാഹനയുടമകൾക്ക് വലിയ ആശ്വാസമാകുന്ന തീരുമാനമാണിത്.
വാഹനം നഷ്ടപ്പെട്ട വിവരം അധികൃതരെ അറിയിക്കുന്ന തിയതി മുതലാണ് ഈ ആനുകൂല്യം ലഭിക്കുക. കാണാതായ ശേഷം വാഹനവുമായി ബന്ധപ്പെട്ട നിയമലംഘനങ്ങളുടെ ഉത്തരവാദിത്വവും യഥാർത്ഥ ഉടമയെ ബാധിക്കില്ല. കളവ് പോവുകയോ കണാതാവുകയോ ചെയ്യുന്ന വാഹനം ഉടമയുടെ പേരിൽതന്നെ കിടക്കുന്നതിനാൽ അതുമായി ബന്ധപ്പെട്ടുണ്ടാകുന്ന ഫീസും പിഴകളും വാഹനയുടമയ്ക്ക് ഇരട്ടി ഭാരമാകുമെന്നതിനാലാണ് മന്ത്രിസഭ നിർണായക തീരുമാനമെടുത്തത്.
