അപകടത്തെ തുടർന്ന് നിർത്താതെ പോയ വാഹനത്തിന്റെ ഡ്രൈവറെ ഞൊടിയിടയിൽ ദുബായ് പൊലീസ് പിടികൂടി. അപകടത്തിൽ 27 കാരനായ ഏഷ്യക്കാരന് ഗുരുതരമായി പരുക്കേറ്റിരുന്നു. മൂന്ന് മണിക്കൂറിനുള്ളിൽ ആണ് അപകടമുണ്ടാക്കിയ വാഹനത്തിന്റെ ഏഷ്യൻ ഡ്രൈവറെ പിടികൂടിയത്.
ഡ്രൈവർ സംഭവസ്ഥലത്ത് നിന്ന് ഓടിപ്പോയതായി പൊലീസ് പറഞ്ഞു. പരുക്കേറ്റയാളെ അടിയന്തര വൈദ്യസഹായത്തിനായി റാഷിദ് ആശുപത്രിയിലേക്ക് മാറ്റിയതായി ബർ ദുബായ് പൊലീസ് സ്റ്റേഷൻ ആക്ടിങ് ഡയറക്ടർ കേണൽ അബ്ദുൽ മൊനീം അബ്ദുൽ റഹ്മാൻ മുഹമ്മദ് പറഞ്ഞു.
കഴിഞ്ഞ ദിവസം രാത്രി പത്തോടെ കമാൻഡ് ആൻഡ് കൺട്രോൾ റൂമിൽ അപകട‌ത്തെക്കുറിച്ച് വിവരം ലഭിക്കുകയായിരുന്നു. അൽഖൂസ് ഇൻഡസ്ട്രിയൽ ഏരിയയിൽ ഒരാൾക്ക് ഗുരുതരമായ പരുക്കേറ്റതായും ഉത്തരവാദിയായ ഡ്രൈവർ സംഭവസ്ഥലത്ത് നിന്ന് ഓടിപ്പോകുകയും ചെയ്തതായി അറിയിച്ചു. സ്ഥിതിഗതികൾ വിലയിരുത്തുന്നതിനും ആവശ്യമായ നടപടികൾ സ്വീകരിക്കുന്നതിനുമായി പൊലീസ് പട്രോളിങ് സംഘത്തെ ഉടൻ അപകടസ്ഥലത്തേക്ക് അയച്ചു. പ്രത്യേക സംഘം ഉടൻ തിരച്ചിൽ ആരംഭിച്ചതോടെയാണ് പ്രതിയെ കണ്ടെത്തിയതെന്ന് അദ്ദേഹം ചൂണ്ടിക്കാട്ടി.
