ഏഷ്യന്‍ പെയിന്റ്സും ഫ്ലവർസ് ചാനലും സംയുക്തമായി തീർത്ത ഭീമന്‍ പൂക്കളത്തിന് റെക്കോർഡ്. മുന്നൂറോളം കലാകാരന്‍മാര്‍ ചേര്‍ന്ന് നാല്‍പതിനായിരം സ്‌ക്വയര്‍ ഫീറ്റ് വലിപ്പത്തിൽ പൂക്കളം ഒരുക്കിയത്. ലിംക ബുക്ക് ഓഫ് റെക്കോര്‍ഡിസിനായുള്ള മത്സരത്തിന്റെ ഭാഗമാവുകയും ബെസ്റ്റ് ഓഫ് ഇന്ത്യ’ എന്ന റെക്കോർഡ് ഈ പൂക്കളത്തിന് ലഭിക്കുകയും ചെയ്തു. ആയിരക്കണക്കിന് ആളുകളാണ് മെഗാ പൂക്കളം കാണാനായി കോഴിക്കോട് ട്രേഡ് സെന്ററിലെത്തിയത്.
320 കലാകാരന്‍മാർ ചേർന്ന് മൂന്ന് മണിക്കൂറോളം പരിശ്രമിച്ചാണ് പൂക്കളം ഒരുക്കിയത്. പതിനയ്യായിരം കിലോ പൂക്കൾ ഇതിനായി ഉപയോഗിച്ചു. കൂടാതെ മെഗാ പൂക്കളത്തിന്റെ ഭാഗമായി വനംമന്ത്രി എകെ ശശീന്ദ്രനും സിനിമ താരങ്ങളായ മാളവിക മേനോനും നിത്യാ ദാസും കോഴിക്കോട് ട്രേഡ് സെന്ററില്‍ എത്തുകയും ചെയ്തു.
അതേസമയം പൂക്കള്‍ ഉപയോഗിച്ചുള്ള ഏറ്റവും വലിയ മഹാബലി എന്ന റെക്കോര്‍ഡും ഈ മെഗാ പൂക്കളം സ്വന്തമാക്കി. ബെംഗളൂരു ഉള്‍പ്പെടെയുള്ള ഇടങ്ങളില്‍ നിന്നാണ് പൂക്കള്‍ എത്തിച്ചിരിക്കുന്നത്. ഏഷ്യന്‍ പെയ്ന്റ്‌സ് കേരള ഹെഡ് പ്രതീപ് പിള്ള, 24 ചാനൽ അസി. എക്‌സിക്യൂട്ടീവ് എഡിറ്റര്‍ ദീപക് ധര്‍മ്മടം എന്നിവരും പരിപാടിയുടെ ഭാഗമായി.
