ഒരു ചിരി ഇരു ചിരി ബമ്പർ ചിരി എന്ന കോമഡി പ്രോഗ്രാമിലൂടെ ശ്രദ്ധേയായ മാളൂട്ടി എന്ന ഹെസ്സ മെഹക്കും മലയാളത്തിന്റെ പ്രിയ താരം മോഹൻലാലും തമ്മിലുള്ള കൂടിക്കാഴ്ചയുടെ വിഡിയോ സമൂഹമാധ്യമങ്ങളിൽ വൈറലാവുന്നു. മഴവിൽ മനോരമയും താരസംഘടനയായ അമ്മയും ചേർന്ന് നടത്തുന്ന മഴവിൽ എന്റർടൈൻമെന്റ് അവാർഡ്സ് – 2023 ന്റെ റിഹേഴ്സൽ ക്യാംപിൽ വച്ചാണ് ഇരുവരും തമ്മിൽ കണ്ട് മുട്ടിയത്.
കിലുക്കം സിനിമയിലെ രേവതിയുടെ ഡയലോഗ് മുതൽ ആറാം തമ്പുരാനിലെ ജഗന്നാഥന്റെ ഡയലോഗ് വരെ കൂട്ടിയിണക്കി തന്റേതായ രീതിയിൽ ഹെസ്സ പറഞ്ഞ് ഫലിപ്പിച്ചത് കൂടി നിന്ന നടന്മാരെയും നടിമാരെയും അത്ഭുതപ്പെടുത്തി. കൂടാതെ ഹെസ്സയുടെ വാക്കുകൾ ശ്രദ്ധയോടെ കേൾക്കുന്ന മോഹൻലാലിനെയും വിഡിയോയില്‍ കാണാം. അതേസമയം മാളൂട്ടി കാണാതെ പഠിച്ച ഡയലോഗ് മുഴുവൻ പറഞ്ഞ് തീരും വരെ മോഹൻലാൽ അരികിൽ തന്നെ ഉണ്ടായിരുന്നു. ഡയലോഗുകൾ എല്ലാം കേട്ടശേഷം ഇതിന് എന്ത് മറുപടിയാണ് പറയേണ്ടതെന്ന് അറിയുന്നില്ല എന്നായിരുന്നു ചിരിച്ചുകൊണ്ട് മോഹൻലാൽ ഹെസ്സയോട് പറഞ്ഞത്.
അതേസമയം ഹെസ്സയുടെ വലിയൊരു ആഗ്രഹം സഫലമായതിന്റ സന്തോഷത്തിൽ അമ്മയായ ഷഹാന പൊട്ടിക്കരഞ്ഞു. എന്റെ അമ്മ സൂപ്പറാ എന്ന റിയാലിറ്റി ഷോയിൽ മാളൂട്ടിയുടെ അമ്മ ഷഹാന നാസറും മത്സരിച്ചിരുന്നു.
