മുൻ കേരള മുഖ്യമന്ത്രിയും മുതിർന്ന കോൺഗ്രസ്‌ നേതാവുമായിരുന്ന ഉമ്മൻ ചാണ്ടിയുടെ വിയോഗം കേരളത്തെ ഒന്നാകെ ദുഃഖത്തിലാഴ്ത്തിയിരിക്കുകയാണ്. വർഷങ്ങൾക്ക്‌ മുൻപ് അദ്ദേഹത്തിന്റെ രൂപ സാദൃശ്യമുള്ള ഒരു സൗദി പൗരൻ വാർത്തകളിൽ ഇടംപിടിച്ചിരുന്നു. ഉമ്മൻ ചാണ്ടിയുടെ നിര്യാണവാർത്ത അറിഞ്ഞപ്പോൾ സൗദിയിലുള്ള പലരും ഈ അപരനെയാണ് ആദ്യം ഓർത്തത്. തെക്കുപടിഞ്ഞാറൻ സൗദിയിലെ ജീസാൻ സ്വദേശിയായ ഹസൻ അൽ അസീരിയെ മരണവാർത്ത അറിയിക്കാൻ ചില മലയാളികൾ മുൻകൈയെടുത്തിരുന്നു. എന്നാൽ ആളെ കണ്ടെത്താൻ കഴിഞ്ഞിട്ടില്ല എന്നാണ് റിപ്പോർട്ടുകൾ.
2015ലായിരുന്നു അന്ന് മുഖ്യമന്ത്രിയായിരുന്ന ഉമ്മൻ ചാണ്ടിയുമായി അത്ഭുതപ്പെടുത്തുന്ന സാദൃശ്യമുള്ള ഹസൻ അൽ അസീരിയുടെ ചിത്രങ്ങൾ സമൂഹമാധ്യമങ്ങളിൽ വൈറലായത്. സ്വന്തം രൂപത്തിലുള്ള ഉമ്മൻ ചാണ്ടിയുടെ ചിത്രം കണ്ട് ഹസൻ അൽ അസീരിയും അമ്പരന്നു പോയിരുന്നു. ഒട്ടും വൈകാതെ തന്നെ കേരളത്തിൽ പോയി ഉമ്മൻ ചാണ്ടിയെ നേരിട്ട് കാണുമെന്ന് അന്ന് പരിചയമുള്ള മലയാളികളോട് അദ്ദേഹം പറഞ്ഞിരുന്നു. എന്നാൽ, പറഞ്ഞത് പോലെ അദ്ദേഹം കേരളത്തിൽ പോയിരുന്നോ എന്നോ ഉമ്മൻ ചാണ്ടിയെ കണ്ടോ എന്നോ ആർക്കും അറിയില്ല.
