കഅ്ബക്ക് പുതിയ കിസ്വ അണിയിച്ചു. ചൊവ്വാഴ്ച രാത്രിയാണ് ഇരുഹറം കാര്യാലയ അധികൃതരുടെ മേൽനോട്ടത്തിൽ കിങ് അബ്ദുൽ അസീസ് കിസ്വ സമുച്ചയത്തിൽ നിന്ന് എത്തിച്ച പുതിയ കിസ്വ കഅ്ബക്ക് അണിയിച്ചത്. പ്രത്യേക വാഹനത്തിൽ വലിയ സുരക്ഷ അകമ്പടിയോടെയായിരുന്നു പുതിയ കിസ്വ മസ്ജിദുൽ ഹറാമിൽ എത്തിച്ചത്.
പഴയ കിസ്വ അഴിച്ചുമാറ്റുന്നതിനും പുതിയത് സ്ഥാപിക്കുന്നതിനും കിസ്വ സമുച്ചയത്തിൽ നിന്നുള്ള വിദഗ്ധ സംഘം നേരത്തെ തന്നെ ഹറമിലെത്തിയിരുന്നു. പഴയ ക്ലാഡിങ് പൊളിച്ചാണ് കഅ്ബയുടെയും അതിന്റെ ഉപരിതലത്തിന്റെയും കോണുകളിൽ പുതിയ പുടവയുടെ ഭാഗങ്ങൾ ഉറപ്പിച്ചതെന്ന് കിസ്വ സമുച്ചയ സാങ്കേതിക, ഓപറേഷൻകാര്യ അസിസ്റ്റന്റ് മേധാവി എൻജി. സുൽത്താൻ അൽ ഖുറൈസി അറിയിച്ചു.
ബെൽറ്റുകൾ, വിരി എന്നിവക്ക് പുറമെ നാല് പ്രധാന കഷ്ണങ്ങളോട് കൂടിയതാണ് പുതിയ കിസ്വ. കിസ്വയുടെ പ്രധാന ഭാഗത്തിന്റെ ഓരോ വശവും കഅ്ബയുടെ മുകളിലേക്ക് ഉയർത്തി പഴയ സ്ഥലത്ത് സ്ഥാപിക്കുകയാണ് ആദ്യം ചെയ്യുക. പിന്നീട് മുകളിൽ നിന്ന് ഒരോ വശവും കെട്ടിയിട്ട് മറ്റേ അറ്റം താഴേക്കിടും. ഇതിന് ശേഷമാണ് ബെൽറ്റുകളും വിരികളും അണിയിക്കുക. കൂടാതെ കിസ്വയുടെ എല്ലാ ഭാഗങ്ങളിലും ഖുർആൻ വാക്യങ്ങൾ ആലേഖനം ചെയ്തിട്ടുണ്ടെന്നും അൽ ഖുറൈസി കൂട്ടിച്ചേർത്തു.
കറുപ്പ് ചായം പൂശിയ ഏകദേശം 850 കിലോയോളം വരുന്ന ശുദ്ധ പട്ടിൽ ഒരു വർഷമെടുത്താണ് കിസ്വ നെയ്തെടുക്കുന്നത്. 120 കിലോ സ്വർണ നൂലും 100 കിലോ വെള്ളി നൂലുമാണ് കിസ്വ നെയ്തെടുക്കാൻ ഉപയോഗിക്കുന്നത്. കിസ്വ നിർമാണ സമുച്ചയത്തിൽ 200 ജോലിക്കാരാണുള്ളത്. ജീവനക്കാരെല്ലാം സ്വദേശികളാണ്. ഡൈയിങ്, കൈകൊണ്ടുള്ള നെയ്ത്ത്, ഓട്ടോമാറ്റിക് നെയ്ത്ത്, പ്രിൻറിങ്, ഗിൽഡിങ്,ബെൽറ്റിങ്, തയ്യൽ, ക്ലാഡിങ് കൂട്ടിച്ചേർക്കൽ എന്നീ ജോലികൾ ചെയ്യുന്ന വ്യത്യസ്ത വകുപ്പുകൾ ഉൾപ്പെടുന്നതാണ് കിസ്വ സമുച്ചയം. ലോകത്തിലെ ഏറ്റവും വലിയ തയ്യൽ മെഷിൻ കൊണ്ടാണ് കിസ്വ നിർമിക്കുന്നത് എന്ന പ്രത്യേകതയുമുണ്ട്. 16 മീറ്റർ നീളമുള്ള ഈ തയ്യൽ മെഷിൻ കമ്പ്യൂട്ടർ സംവിധാനത്തിലാണ് പ്രവർത്തിക്കുന്നത്.
