തൃക്കാക്കര എംഎൽഎ ആയി ഉമ തോമസ് സത്യപ്രതിജ്ഞ ചെയ്‌തു. ദൈവനാമത്തിലായിരുന്നു സത്യപ്രതിജ്ഞ ചെയ്‌തത്. പ്രതിപക്ഷ നേതാവ് വി ഡി സതീശനും രമേശ് ചെന്നിത്തലയും ഉൾപ്പെടെയുള്ള നേതാക്കൾ ചടങ്ങിൽ ഒപ്പമുണ്ടായിരുന്നു. നിയമസഭയിലെ കോൺഗ്രസിന്റെ ആദ്യ വനിതാ എംഎൽഎ ആണ് ഉമ തോമസ്. നിയമസഭാ സെക്രട്ടറിയായ കവിത ഉണ്ണിത്താനാണ് ഉമ തോമസിനെ സത്യപ്രതിജ്ഞയ്ക്കായി ക്ഷണിച്ചത്.
ഇന്ന് രാവിലെ 11.30ന് സ്പീക്കർ എം ബി രാജേഷിന്റെ ചേംബറിലായിരുന്നു സത്യപ്രതിജ്ഞ ചടങ്ങ് നടന്നത്. പ്രതിപക്ഷ നേതാവ് വി ഡി സതീശനും മുൻ മുഖ്യമന്ത്രി ഉമ്മൻ ചാണ്ടിയും മുൻ പ്രതിപക്ഷ നേതാവ് രമേശ് ചെന്നിത്തലയും പൂച്ചെണ്ട് നൽകി ഉമ തോമസിനെ അഭിനന്ദിച്ചു. ഈ മാസം 27 മുതൽ ആരംഭിക്കുന്ന നിയമസഭ സമ്മേളനത്തിൽ ഉമ തോമസ് പങ്കെടുക്കും.
72767 വോട്ടുകൾക്കായിരുന്നു തൃക്കാക്കരയിൽ ഉമ തോമസിന്റെ വിജയം. അന്തരിച്ച പി ടി തോമസ് 2021ൽ നേടിയതിനേക്കാൾ 12,928 വോട്ടുകളാണ് ഉമ നേടിയത്.
