2019 ജനുവരി ഒന്നിന് മുമ്പ് ലൈസൻസ് പ്ളേറ്റുകളുടെ കാലാവധി അവസാനിച്ച വാഹനങ്ങളുടെ രജിസ്ട്രേഷൻ റദ്ദാക്കുമെന്ന് റാസൽ ഖൈമ വെഹിക്കിൾസ് ആൻഡ് ഡ്രൈവേഴ്‌സ് ലൈസൻസിംഗ് വകുപ്പ്. കാലഹരണപ്പെട്ട ലൈസൻസുകൾ പൂർണമായും ഒഴിവാക്കുന്നതിൻ്റെ ഭാഗമായാണ് നീക്കം. നിരത്തുകളിൽ നിന്ന് ഇത്തരം വാഹനങ്ങൾ ഒഴിവാക്കുന്നതിന് പരിശോധനകളും ശക്തമാക്കി.
അതേസയയം സമ്പൂർണ രജിസ്ട്രേഷൻ നടപടികൾ ആരംഭിക്കുന്നതിന് മുമ്പ് ലൈസൻസുകൾ പുതുക്കുന്നതിന് ഒരു മാസത്തെ ഗ്രേസ് പിരീഡ് പ്രയോജനപ്പെടുത്താമെന്നും അധികൃതർ സൂചിപ്പിച്ചു. കൃത്യസമയത്ത് വാഹന ലൈസൻസ് പ്ലേറ്റ് പുതുക്കാത്തവർക്കുള്ള പിഴയെ കുറിച്ചും അധികൃതർ ഓർമ്മപ്പെടുത്തൽ നൽകിയിട്ടുണ്ട്.
ഒരു വാഹനത്തിൻ്റെ ലൈസൻസ് പ്ലേറ്റും ഇൻഷുറൻസും കാലാവധി തീരുന്നതിന് 40 ദിവസം മുമ്പ് പുതുക്കിയിരിക്കണമെന്നാണ് നിർദ്ദേശം. വീഴ്ചയുണ്ടായാൽ 500 ദിർഹം പിഴയും നാല് ബ്ലാക്ക് പോയിൻ്റുകളുമാണ് ലഭിക്കുക. പിഴയടച്ചതിന് ശേഷവും രജിസ്ട്രേഷൻ വൈകിയാൽ 15ആം ദിവസം വീണ്ടും പിഴചുമത്തും. മൂന്ന് മാസം പിന്നിട്ടിട്ടും വാഹനത്തിൻ്റെ ലൈസൻസ് പ്ലേറ്റ് പുതുക്കിയില്ലെങ്കിൽ വാഹനം ഏഴ് ദിവസത്തേക്ക് പിടിച്ചെടുക്കാനും വൃവസ്ഥയുണ്ട്.
