ഡ്രൈവിംഗ് ലൈസൻസ് ടെസ്റ്റുകൾക്കായി ഷാർജ പോലീസ് ‘വൺ ഡേ ടെസ്റ്റ്’ എന്ന പുതിയ സംരംഭം പ്രഖ്യാപിച്ചു. ഒരേ ദിവസം തന്നെ പ്രിലിമിനറി, സിവിൽ ടെസ്റ്റുകൾ സംയോജിപ്പിച്ച് ഒരേ ദിവസം തന്നെ പരീക്ഷകൾ നടത്താൻ അപേക്ഷകരെ ഈ സംരംഭം അനുവദിക്കുമെന്ന് ഷാർജ പോലീസ് അറിയിച്ചു. നാഷണൽ സർവീസ് റിക്രൂട്ട്‌മെന്റുകൾക്കും ഹൈസ്‌കൂൾ ബിരുദധാരികൾക്കും വേണ്ടിയാണ് ഏകദിന ടെസ്റ്റ് സംരംഭത്തിന് തുടക്കം കുറിച്ചിരിക്കുന്നതെന്നും അധികൃതർ കൂട്ടിച്ചേർത്തു.
അതേസമയം ഈ സംരംഭം സെപ്റ്റംബറിൽ അവസാനിക്കും. കൂടാതെ ഇലക്‌ട്രോണിക്, ഓൺ-സൈറ്റ് എന്നിങ്ങനെ രണ്ട് ഘട്ടങ്ങളിലായാണ് സർവീസ് നടത്തുകയെന്നും മെക്കാനിക്‌സ് ആൻഡ് ഡ്രൈവേഴ്‌സ് ലൈസൻസിംഗ് വകുപ്പ് ഡയറക്ടർ കേണൽ ഖാലിദ് മുഹമ്മദ് എൽ-കെ പറഞ്ഞു.
ആദ്യ ഘട്ടം ഇലക്‌ട്രോണിക് രീതിയിലായിരിക്കും നടക്കുക. ഇതിന് നേരിട്ട് ഹാജരാകേണ്ടതില്ല. എം.ഒ. ഐ (ഇന്റീരിയർ മന്ത്രാലയം) ആപ്ലിക്കേഷൻ ഉപയോഗിച്ച് ഒരു അപേക്ഷകന് പുതിയ ഡ്രൈവിംഗ് ലൈസൻസിനായി ഒരു ഫയൽ തുറക്കാൻ സാധിക്കും. അതേസമയം തിയറി പരീക്ഷ ഓൺലൈനിൽ വിജയിച്ച ശേഷം മാത്രമേ അപേക്ഷകന് രണ്ടാം ഘട്ടത്തിലേക്ക് നീങ്ങാൻ കഴിയൂ. അതിൽ പ്രായോഗിക പരിശീലനവും ഉൾപ്പെടുന്നു. അതിനുശേഷം അന്തിമ പരീക്ഷാ തീയതിയിൽ ഒരേ ദിവസം പ്രിലിമിനറി, സിവിൽ പരീക്ഷകൾ നടക്കും.
