അബുദാബിയിലെ വൃത്തിഹീനമായ ഒരു ഭക്ഷണശാല അടച്ചുപൂട്ടാൻ എമിറേറ്റിലെ ഭക്ഷ്യ സുരക്ഷാ അതോറിറ്റി ഉത്തരവിട്ടു. എവർഗ്രീൻ വെജിറ്റേറിയൻ റെസ്റ്റോറന്റാണ് പൂട്ടിച്ചത്. അബുദാബി അഗ്രികൾച്ചർ ആൻഡ് ഫുഡ് സേഫ്റ്റി അതോറിറ്റി (അദാഫ്സ) പ്രകാരമാണ് നടപടി.
റസ്റ്ററന്റിന്റെ സിങ്കിന് ചുറ്റുമുള്ള പ്രാണികൾ, പാത്രങ്ങളും ഭക്ഷണസാധനങ്ങളും വൃത്തിഹീനമായ സാഹചര്യത്തിൽ സൂക്ഷിക്കുക, കാര്യക്ഷമമല്ലാത്ത തണുപ്പിക്കൽ എന്നിവ ഉൾപ്പെടെ ഒന്നിലധികം ഭക്ഷ്യ സുരക്ഷാ ലംഘനങ്ങൾ കണ്ടെത്തിയിട്ടുണ്ട്.
റഫ്രിജറേറ്ററിൽ, റെഡി-ടു-ഈറ്റ് ഭക്ഷണത്തിന് ശരിയായ താപനില നിലനിർത്തുന്നില്ലെന്നും കണ്ടെത്തി. റസ്റ്റോറന്റിന് ആവർത്തിച്ച് മുന്നറിയിപ്പ് നൽകിയെങ്കിലും തിരുത്തൽ നടപടികൾ സ്വീകരിച്ചില്ല. ഭക്ഷ്യ സുരക്ഷാ ആവശ്യകതകൾ പാലിക്കുന്നുണ്ടെന്ന് ഉറപ്പുവരുത്തുന്നതിനും പൊതുജനാരോഗ്യം സംരക്ഷിക്കുന്നതിനുമായി എമിറേറ്റിലെ ഭക്ഷണശാലകളിലും റെസ്റ്റോറന്റുകളിലും അഡാഫ്‌സ പതിവായി പരിശോധന നടത്തുന്നുണ്ട്. ഭക്ഷ്യ സുരക്ഷാ നിയമങ്ങൾ ലംഘിച്ചതിന് 2023 മെയ് മാസത്തിൽ അൽ ഐനിലെ ഹോളോമീറ്റ് റെസ്റ്റോറന്റ് എന്ന മറ്റൊരു റെസ്റ്റോറന്റ് അടച്ചുപൂട്ടിയിരുന്നു. ഇത്തരത്തിലുള്ള നിയമലംഘനങ്ങൾ ശ്രദ്ധയിൽപ്പെട്ടാൽ അബുദാബി സർക്കാർ ടോൾ ഫ്രീ നമ്പറായ 800555-ൽ വിളിച്ച് അറിയിക്കണമെന്ന് അതോറിറ്റി പൊതുജനങ്ങളോട് അഭ്യർത്ഥിച്ചു.
