വിവിധ കേസുകളിലായി ദമാമിലെ ജയിലിൽ കഴിയുന്ന മലയാളികളടക്കം ഇന്ത്യൻ തടവുകാരുടെ എണ്ണം ആശങ്കാ ജനകമാവും വിധം വർധിക്കുന്നതായി ഇന്ത്യൻ എംബസി സാമൂഹിക സേവന വൊളൻറിയർമാർ അറിയിച്ചു. ഏറ്റവും പുതിയ റിപ്പോർട്ട് പ്രകാരം നിലവിൽ 400 ലേറെ പേരാണ് വിവിധ കേസുകളിലായി ദമാം സെൻട്രൽ ജയിലിൽ ശിക്ഷ അനുഭവിച്ചു കൊണ്ടിരിക്കുന്നത്. ഇതിൽ ഇരുനൂറോളം പേരും മലയാളികളാണ്. കഴിഞ്ഞ വർഷം165 പേർ ആയിരുന്നു ഉണ്ടായിരുന്നത്. ഇത് മൂന്ന് മടങ്ങിനടുത്ത് വർധിച്ച് 400 പേരായി ഉയർന്നിരിക്കുകയാണ്.
അതേസമയം ലഹരിമരുന്ന് കേസിൽ പിടിയിലായ മിക്ക മലയാളികളും മറ്റു രാജ്യക്കാരായ ലഹരിമരുന്ന് കച്ചവടക്കാരുമായി ബന്ധമുള്ളവരാണ്. ധന സമ്പാദനത്തിനുള്ള എളുപ്പവഴി അന്വേഷിച്ചാണ് പലരും ഇത്തരം മയക്കുമരുന്ന് റാക്കറ്റുകളുടെ കണ്ണികളാവുന്നത്. എന്നാൽ ആറുവർഷം മുമ്പ് ലഹരിമരുന്ന് കേസിൽപ്പെട്ട ഏതാനും മലയാളികളുടെ വധശിക്ഷ നടപ്പാക്കിയതിനുശേഷം ഇത്തരത്തിലുള്ള ശിക്ഷകളിൽ മലയാളികളുടെ എണ്ണം കുറഞ്ഞിരുന്നു.
തമിഴ്നാട്ടുകാരും മലയാളികളും ജയിലിൽ എത്തിയിരുന്നത് മദ്യക്കടത്ത് കേസുകളിലാണ്. ഇപ്പോഴത് ലഹരിമരുന്ന് ഉപയോഗത്തിലേക്കും വിൽപനയിലേക്കും കൂടി വ്യാപിച്ചു എന്നും ഇന്ത്യൻ എംബസി സാമൂഹിക സേവന വൊളൻറിയർമാർ അറിയിച്ചു. ഇത് കൂടാതെ മറ്റ് കേസുകളിൽപ്പെട്ട് ശിക്ഷ അനുഭവിക്കുന്നവരും ധരാളമാണ്.
മകളെ പീഡിപ്പിച്ച ഒരു മലയാളി
സ്വന്തം മകളെ പീഡിപ്പിച്ച മലയാളിയായ ഒരു പിതാവിന് ആദ്യം വിധിച്ചത് മൂന്ന് വർഷത്തെ തടവായിരുന്നു. എന്നാൽ മേൽകോടതി ഇത് 15 വർഷമായി വർധിപ്പിച്ചിട്ടുണ്ട്. പീഡനത്തിനിരയായ മകളും മാതാവും ഇദ്ദേഹത്തിന് മാപ്പ് കൊടുക്കാൻ തയാറായപ്പേഴേക്കും ശിക്ഷ വിധിക്കപ്പെട്ടിരുന്നു. അതേസമയം അടുത്തയാഴ്ച നാട്ടിലേയ്ക്കുള്ള മടക്ക ടിക്കറ്റ് ശരിയായിട്ടുള്ള 12 പേരിൽ ലഹരി മരുന്ന് കേസിൽപ്പെട്ട 23 വയസ്സുകാരനും ഉൾപ്പെടുന്നു. 21–ാം വയസ്സിൽ ആണ് ഈ യുവാവ് ജയിലിലായത്. ഇവിടെ താമസിക്കുന്ന കുടുംബങ്ങളിൽപ്പെട്ട കുട്ടികളിൽ കുറേ പേർ ജയിലിലുണ്ട് .
ശിക്ഷാകാലാവധി കഴിഞ്ഞിട്ടും പുറത്തിറങ്ങാത്തവർ
ശിക്ഷാ കാലാവധി കഴിഞ്ഞിട്ടും ജയിലിൽ തുടരുന്നവരുടെ എണ്ണവും വർധിക്കുകയാണ്. രണ്ടാഴ്ച മുൻപ് ഇന്ത്യൻ എംബസി തടവിലുള്ള ഇന്ത്യക്കാരുടെ വിവരങ്ങൾ പൂർണമായും ശേഖരിച്ചതായി എംബസി വിഭാഗം വൊളൻറിയർമാരും സാമൂഹിക പ്രവർത്തകനുമായ മണിക്കുട്ടൻ പദ്മനാഭനും മഞ്ജു മണിക്കുട്ടനും അറിയിച്ചു.
