സെല്‍ഫ് ഡ്രൈവിംഗ് കാറുകള്‍ ഓടിക്കാനുള്ള ആദ്യ ലൈസൻസിന് യുഎഇ അംഗീകാരം നൽകി. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമിന്റെ അധ്യക്ഷതയില്‍ തിങ്കളാഴ്ച ചേര്‍ന്ന മന്ത്രിസഭാ യോഗത്തിലാണ് അംഗീകാരം ലഭിച്ചത്.
രാജ്യത്തെ റോഡുകളില്‍ സ്വയം ഓടിക്കുന്ന വാഹനങ്ങള്‍ക്കുള്ള ഇത്തരത്തിലുള്ള ആദ്യ ലൈസന്‍സായിരുന്നു ഇത്. വ്യത്യസ്ത തരം ഓട്ടോണമസ് വാഹനങ്ങള്‍ പരീക്ഷിക്കുന്ന WeRide കമ്പനിക്കാണ് ലൈസന്‍സ് അനുവദിച്ചിരിക്കുന്നത്. യുഎഇയിലെ യാത്രാ രംഗത്തെ ഭാവിയെ പുനർനിർവചിക്കുന്ന വ്യത്യസ്ത തരം സ്വയം ഓടുന്ന വാഹനങ്ങൾ കമ്പനി പരീക്ഷിക്കും. ‘വീറൈഡി’ന് ലൈസൻസ് അനുവദിച്ചതായി യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം ട്വിറ്ററിൽ കുറിച്ചു.
വീറൈഡിന്റെ ആസ്ഥാനം ചൈനയിലെ ഗ്വാങ്‌ഷൂവിലാണ്. മറ്റ് നഗരങ്ങൾക്കൊപ്പം അബുദാബിയിലും കേന്ദ്രങ്ങളുണ്ട്. ലോകത്തെ 26 ലേറെ നഗരങ്ങളിൽ ഇത് സ്വയം ഡ്രൈവിങ് ഗവേഷണവും പ്രവർത്തനങ്ങളും നടത്തുന്നു. വീറൈഡ് ഒരു റോബോടാക്സി, റോബോ ബസ്, റോബോ വാൻ, റോബോവീപ്പർ, അ‍ഡ്വാൻസ്ഡ് ഡ്രൈവിങ് സൊലൂഷൻ എന്നിവയുടെ സേവനം വാഗ്ദാനം ചെയ്യുന്നു.
