ഡെല്‍റ്റ എയര്‍ലൈന്‍സ് ബോയിങ് 717 വിമാനത്തിന്റെ മുന്‍ചക്രം പ്രവര്‍ത്തന രഹിതമായതോടെ അടിയന്തര ലാന്‍ഡിങ് നടത്തി. യു.എസിലെ ഷാര്‍ലറ്റ് ഡഗ്ലസ് അന്താരാഷ്ട്ര വിമാനത്താവളത്തിലാണ് സംഭവമുണ്ടായത്. വ്യാഴാഴ്ച രാവിലെ 7.25-ന് അറ്റ്ലാന്‍റയിൽ നിന്നും പുറപ്പെട്ട വിമാനത്തിന്റെ മുൻ ചക്രത്തിന് തകരാർ സംഭവിച്ചത് ശ്രദ്ധയിൽപ്പെട്ട ഉടൻ തന്നെ അടിയന്തരമായി നിലത്തിറക്കി. മുൻചക്രങ്ങൾ തകരാറിലായതോടെ വിമാനം നിലത്തിറക്കുന്നത് സംബന്ധിച്ച ആശങ്ക ഉയര്‍ന്നിരുന്നു. തുടര്‍ന്ന് മുന്‍ഭാഗം റണ്‍വേയില്‍ ഉരസുന്ന നിലയിലാണ് വിമാനം നിലത്തിറക്കിയത്.
മുന്‍ചക്രങ്ങള്‍ നിവരില്ല എന്ന് വ്യക്തമായതോടെ പൈലറ്റുമാര്‍ ആവശ്യമായ മുന്‍കരുതല്‍ നടപടികള്‍ സ്വീകരിച്ചു. ഇതിന് ശേഷമായിരുന്നു വിമാനം ലാന്‍ഡ് ചെയ്തത്. 96 യാത്രക്കാരും രണ്ട് പെെലറ്റുമാരും മൂന്ന് ജീവനക്കാരും വിമാനത്തില്‍ ഉണ്ടായിരുന്നതായി എയർലെെൻസ് അറിയിച്ചു. ആർക്കും പരിക്കുകളില്ലെന്നും എയർലൈൻസ് കൂട്ടിച്ചേർത്തു. റൺവേയിൽ നിന്ന് വിമാനം മാറ്റുന്നതിന്റെ ഭാഗമായി വിമാനത്താവളത്തിലെ റൺവേ താത്കാലികമായി അടച്ചിടുമെന്നും അധികൃതർ അറിയിച്ചു.
