സോഷ്യൽ മീഡിയയിൽ വൈറലായ ലുക്കൗട്ട് നോട്ടീസ് കണ്ട് ഞെട്ടിയിരിക്കുകയാണ് പ്രേക്ഷകർ. നിരവധി ക്രിമിനൽ കേസുകളിൽ പ്രതിയായ കൊടുംകുറ്റവാളി, നാൽപ്പത്തിയേഴു വയസ്സ്, അശോകൻ എന്ന് പേരുള്ള ഒരാളെ അന്വേഷിച്ചുള്ള ലുക്കൗട്ട് നോട്ടീസാണ് സമൂഹമാധ്യമങ്ങളെ ഞെട്ടിച്ചിരിക്കുന്നത്. മലയാളവും തമിഴും സംസാരിക്കുന്ന, നിലവിൽ ഒളിവിൽ പോയിരിക്കുന്ന അശോകനെ കുറിച്ച് എന്തെങ്കിലും വിവരം ലഭിക്കുന്നവർ ബന്ധപെട്ടവരെ അറിയിക്കുവാനാണ് നോട്ടീസിൽ പറയുന്നത്.
ഇതിൽ ഞെട്ടിക്കുന്ന വസ്തുത എന്തെന്നാൽ നോട്ടീസിൽ കാണിച്ചിരിക്കുന്ന അശോകന് നടൻ കുഞ്ചാക്കോ ബോബന്റെ മുഖഛായ ആണെന്നതാണ്. പുതിയ ചിത്രത്തിന് വേണ്ടിയുള്ള പ്രൊമോഷന്റെ ഭാഗമായാണോ ഈ ലുക്കൗട്ട് നോട്ടീസ് എന്നാണ് പ്രേക്ഷകരുടെ സംശയം. എന്താണെന്ന് വ്യക്തമല്ലെങ്കിലും അധികം വൈകാതെ തന്നെ അണിയറപ്രവർത്തകർ ആ രഹസ്യം പുറത്തുവിടുമെന്നാണ് പ്രേക്ഷകരുടെ പ്രതീക്ഷ. എന്നാൽ ടിനു പാപ്പച്ചൻ സംവിധാനം ചെയ്യുന്ന ചാവേർ എന്ന സിനിമയെക്കുറിച്ചുള്ള സൂചനയാണ് ഇതെന്നാണ് സംസാരം.
മലയാളത്തിലെ റൊമാന്റിക് -ചോക്ലേറ്റ് ഹീറോ എന്ന പേരിൽ അറിയപ്പെടുന്ന ചാക്കോച്ചൻ ആ പരിവേഷം മാറ്റി വച്ച് സീരിയസ് കഥാപാത്രങ്ങളിലേക്ക് ചുവട് മാറ്റിയിട്ട് കുറച്ച് നാളുകളായി. ഈയിടെ ചാക്കോച്ചന്റെതായി പുറത്തിറങ്ങിയ എല്ലാ സിനിമകളും പ്രേക്ഷകർ ഇരുകൈകളും നീട്ടി സ്വീകരിച്ചിരുന്നു. താരത്തിന്റെ സമീപകാല ഹിറ്റുകളായ ന്നാ താൻ കേസുകൊട്, നായാട്ട്, അഞ്ചാം പാതിര, അള്ളു രാമേന്ദ്രൻ തുടങ്ങിയ ചിത്രങ്ങൾ വൻ ഹിറ്റുളായിരുന്നു.
