പ്രഭാസിനെ നായകനാക്കി വൈജയന്തി മൂവീസ് ഒരുക്കുന്ന ബിഗ് ബജറ്റ് ചിത്രമാണ് ‘പ്രൊജക്ട് കെ’. നാഗ് അശ്വിൻ കഥയെഴുതി സംവിധാനം ചെയ്യുന്ന ചിത്രത്തിൽ വലിയ താരനിര തന്നെയാണ് അണിനിരക്കുന്നത്. ചിത്രീകരണത്തിലിരിക്കുന്ന ചിത്രത്തിന്റെ പുതിയ വിശേഷമാണ് ഇപ്പോൾ പുറത്തുവരുന്നത്. ചിത്രത്തിൽ ഉലകനായകൻ കമൽഹാസനുമുണ്ടെന്ന വാർത്തയാണ് നിർമ്മാതാക്കളായ വൈജയന്തി മൂവീസ് ഔദ്യോഗികമായി പുറത്തുവിട്ടത്.
പ്രഭാസ് നായകനാവുന്ന ഈ ചിത്രത്തിൽ വില്ലൻ വേഷത്തിൽ കമൽഹാസൻ എത്തുമെന്ന് നേരത്തേ സോഷ്യൽ മീഡിയയിൽ ചർച്ചകളുണ്ടായിരുന്നു. അത് ഉറപ്പിക്കുന്നതാണ് നിർമ്മാതാക്കളുടെ ഇപ്പോഴത്തെ വെളിപ്പെടുത്തൽ. എന്നാൽ കമൽഹാസൻ ചിത്രത്തിലുണ്ടാവുമെന്ന് അറിയിച്ചതല്ലാതെ അദ്ദേഹത്തിന്റെ കഥാപാത്രത്തേക്കുറിച്ചുള്ള വിവരങ്ങൾ നിർമ്മാതാക്കൾ പുറത്തുവിട്ടിട്ടില്ല.
അമിതാഭ് ബച്ചൻ, ദീപിക പദുക്കോൺ, ദിഷാ പഠാണി എന്നിവരാണ് പ്രോജക്ട് കെയിലെ മറ്റ് പ്രധാന അഭിനേതാക്കൾ. ദീപിക പദുകോണിന്റെ ആദ്യ തെലുങ്ക് ചിത്രമാണിത്. വൈജയന്തി മൂവീസ് നിർമ്മിക്കുന്ന അമ്പതാമത്തെ ചിത്രമാണ് ഇത്. ആരാധകർ ഏറെ പ്രതീക്ഷയോടെ കാത്തിരിക്കുന്ന ഈ പ്രഭാസ് ചിത്രം 2024 ജനുവരി 12-ന് തിയേറ്ററുകളിലെത്തും.
