അടുത്ത വർഷത്തിനുള്ളിൽ ഖത്തർ എയർവേയ്‌സിന്റെ എയർബസ് 380 വിമാനങ്ങളുടെ സർവീസ് നിർത്തലാക്കുമെന്ന് ഗ്രൂപ്പ് സിഇഒ അക്ബർ അൽ ബേക്കർ അറിയിച്ചു. എയർബസ് 380 വിമാനത്തിന് തകരാറുകൾ നേരിട്ടിട്ടുണ്ടെന്നും വരും വർഷങ്ങളിലായി അവയുടെ ഉപയോഗം കമ്പനി നിർത്തലാക്കുമെന്നും അൽബേക്കർ പാരിസ് എയർഷോയിലാണ് വ്യക്തമാക്കിയത്.
10 എ380 വിമാനങ്ങളിൽ എട്ടെണ്ണം മാത്രമാണ് ഇപ്പോൾ സർവീസ് നടത്തുന്നത്. ഈ വിമാനങ്ങൾ നിർത്തലാക്കുന്നതോടെ എ380 വിമാനങ്ങൾക്ക് പകരം എ350 വിമാനങ്ങളായിരിക്കും ഇനി ഉപയോഗിക്കുക. 2020ൽ കോവിഡ് കാലത്താണ് എ380 വിമാനങ്ങളിൽ തകരാർ കണ്ടെത്തിയത്. ഇതിനെ തുടർന്നാണ് ഈ വിമാനങ്ങൾ നിലത്തിറക്കിയത്. പിന്നീട് 2021 ൽ വ്യോമ മേഖലയിൽ തിരക്ക്‌ വർധിച്ചതോടെ പരിഹരിച്ച് സർവീസ് പുനരാരംഭിക്കുകയായിരുന്നു.
അതേസമയം എ380 വിമാനങ്ങളുടെ തകരാറുമായി ബന്ധപ്പെട്ട് നിർമാണ കമ്പനിയായ എയർബസിനെതിരെ ഖത്തർ എയർവേയ്‌സ് കോടതിയിൽ നൽകിയ കേസ് കഴിഞ്ഞ ഫെബ്രുവരിയിലാണ് ഒത്തുതീർപ്പായത്. കൂടാതെ നിയമ യുദ്ധങ്ങൾക്കിടെ റദ്ദാക്കിയ 73 വിമാനങ്ങൾക്കുള്ള ഓർഡറും പുനഃസ്ഥാപിച്ചിരുന്നു. മാത്രമല്ല, അടുത്തിടെയാണ് പുതിയ ദീർഘദൂര വിമാനങ്ങളിൽ നിന്ന് ഫസ്റ്റ് ക്ലാസ് കാബിനുകൾ ഒഴിവാക്കുന്നതായി അൽബേക്കർ പ്രഖ്യാപിച്ചത്. ഫസ്റ്റ് ക്ലാസിലെ അതേ സൗകര്യങ്ങൾ ബിസിനസ് ക്ലാസിനും നൽകുന്നതിനെ തുടർന്നായിരുന്നു ഇത്.
