സൗദിയുടെ ബഹിരാകാശ ദൗത്യം വിജയകരമായി പൂർത്തിയാക്കി തിരിച്ചെത്തിയ ബഹിരാകാശ സഞ്ചാരി റയ്യാന ബർനാവിക്കും സഹ സഞ്ചാരി അലി അൽ ഖർനിക്കും റിയാദ് കിങ് ഖാലിദ് രാജ്യാന്തര വിമാനത്താവളത്തിൽ രാജകീയ സ്വീകരണം നൽകി. അതേസമയം രാജ്യാന്തര ബഹിരാകാശ നിലയത്തിൽ എത്തി ശാസ്ത്ര പരീക്ഷണങ്ങളിൽ പങ്കാളിയാകുന്ന ആദ്യ അറബ്, മുസ്‌ലിം വനിത എന്ന റെക്കോർഡും റയ്യാന സ്വന്തമാക്കി. കൂടാതെ ഒരേ സമയം രണ്ട് പേരെ ബഹിരാകാശ നിലയത്തിൽ എത്തിച്ച ആദ്യ അറബ് രാജ്യം കൂടിയാണ് സൗദി അറേബ്യ.
എട്ട് ദിവസത്തെ ബഹിരാകാശ ദൗത്യം വിജയകരമായി പൂർത്തിയാക്കി ഇരുവരും മേയ് 31ന് തന്നെ ഭൂമിയിൽ തിരിച്ചെത്തിയിരുന്നു. എന്നാൽ വിവിധ ടെസ്റ്റുകൾക്കും പരീക്ഷണങ്ങൾക്കുമായി നിരീക്ഷണ കേന്ദ്രത്തിൽ രണ്ട് ആഴ്ച കൂടി കഴിഞ്ഞ ശേഷമാണ് മാതൃ രാജ്യത്തേക്ക് മടങ്ങിയെത്തിയത്. കൂടാതെ ബഹിരാകാശ ദൗത്യത്തിനായി പരിശീലനം നേടിവരുന്ന മർയം ഫിർദൗസ്, അലി അൽ ഗാംദി എന്നിവരും ഇവരെ അനുഗമിച്ചു. അതേസമയം ബഹിരാകാശ ഗവേഷണ രംഗത്ത് സൗദി അറേബ്യയുടെ സ്ഥാനം മെച്ചപ്പെടുത്താൻ ഇതുവഴി സാധിക്കുമെന്ന് മന്ത്രി പറഞ്ഞു. ബഹിരാകാശത്ത് 14 ശാസ്ത്ര പരീക്ഷണങ്ങളാണ് നടത്തിയത്. മൂന്ന് വിദ്യാഭ്യാസ ബോധവൽക്കരണ പരീക്ഷണങ്ങളിൽ 47 ഇടങ്ങളിൽ നിന്നായി 12,000 വിദ്യാർഥികളും ഇവരോടൊപ്പം ലൈവിൽ ചേർന്നു.
റിയാദ് കിങ് ഖാലിദ് രാജ്യാന്തര വിമാനത്താവളത്തിൽ കമ്യൂണിക്കേഷൻസ്, ഐ.ടി മന്ത്രിയും സൗദി സ്പേസ് ഏജൻസി ഡയറക്ടർബോർഡ് ചെയർമാനുമായ എൻജിനീയർ അബ്ദുല്ല അൽ സവാഹ, കിങ് അബ്ദുൽഅസീസ് സിറ്റി ഫോർ സയൻസ് ആൻഡ് ടെക്നോളജി പ്രസിഡന്റ് ഡോ.മുനീർ അൽ ദസൂഖി, സൗദി നിയുക്ത സേനാ മേധാവി ജനറൽ ഫയാദ് അൽ റുവൈലി, സൗദി സ്പേസ് ഏജൻസി വൈസ് ചെയർമാൻ ഡോ. മുഹമ്മദ് അൽ തമീമി എന്നിവരും സഞ്ചാരികളുടെ ബന്ധുക്കളും ചേർന്നാണ് ഇവരെ സ്വീകരിച്ചത്.
