1983 ജൂൺ 25 ലോകക്രിക്കറ്റ് ചരിത്രത്തിൽ ഇന്ത്യയുടെ പേരെഴുതി ചേർത്ത വർഷമായിരുന്നു. രാജ്യത്തിന്റെ അഭിമാനം വാനോളം ഉയർത്തിയ ഇന്ത്യയുടെ ആദ്യ ക്രിക്കറ്റ് ലോകകപ്പ് കിരീട നേട്ടത്തിൻറെ നാല്പതാം വാർഷികം ആഘോഷമാക്കുകയാണ് ആരാധകർ. കൂടാതെ തിരുവനന്തപുരം ഗോൾഫ് ക്ലബിലെത്തിയ ഇന്ത്യൻ ടീം നായകൻ കപിൽദേവ് ലോകകപ്പിന്റെ ഓർമകളും പങ്കുവെച്ചു.
അതേസമയം ഇന്ത്യയുടെ ആദ്യ ക്രിക്കറ്റ് ലോകകപ്പ് വിജയത്തിൻറെ നാല്പതാം വാർഷികം ആഘോഷമാക്കാൻ കപിൽദേവും സംഘവും പദ്ധതിയിടുന്നുണ്ട്. ലോകകപ്പ് കിരീട നേട്ടം സുന്ദരമായ ഓർമയാണെന്നും മുംബൈയിൽ ടീമംഗങ്ങൾ വീണ്ടും ഒത്തുചേരുമെന്നും കപിൽദേവ് തിരുവനന്തപുരത്ത് വച്ച് പറഞ്ഞു. ഗോൾഫിൽ സജീവമായ കപിൽ ദേവ് തിരുവനന്തപുരം ഗോൾഫ് ക്ലബിൽ പന്തുതട്ടുകയും ആരാധകർക്കൊപ്പം ഫോട്ടോയും എടുത്തത്തിന് ശേഷമാണ് കേരളത്തിൽ നിന്ന് മടങ്ങിയത്. അതേസമയം ഗുസ്തിതാരങ്ങളുടെ സമരത്തെ കുറിച്ചും ലോക ടെസ്റ്റ് ചാമ്പ്യൻഷിപ്പിലെ ഇന്ത്യൻ ടീമിൻറെ ദയനീയ തോൽവിയെക്കുറിച്ചുമുള്ള വിവാദ വിഷയങ്ങളോട് കപിൽ ദേവ് പ്രതികരിച്ചില്ല.
