നടന്‍ വിജയുടെ പിറന്നാള്‍ ആഘോഷമാക്കാനൊരുങ്ങി ലോകേഷ് കനകരാജ് സംവിധാനം ചെയ്യുന്ന ‘ലിയോ’ സിനിമയുടെ അണിയറ പ്രവര്‍ത്തകര്‍. വിജയുടെ പിറന്നാള്‍ ദിനമായ ജൂണ്‍ 22 ന് ചിത്രത്തിലെ ആദ്യഗാനം റിലീസ് ചെയ്യുമെന്ന് അണിയറപ്രവർത്തകർ അറിയിച്ചു. വിജയ് തന്നെയാണ് ഈ വിവരം സമൂഹമാധ്യമങ്ങളിലൂടെ പങ്കുവച്ചത്. കൂടാതെ ചിത്രത്തിലെ പുതിയ പോസ്റ്ററും പുറത്തുവിട്ടിട്ടുണ്ട്. അടുത്തിടെയാണ് ആയിരത്തോളം നര്‍ത്തകര്‍ക്കൊപ്പം നൃത്തം ചെയ്യുന്ന വിജയുടെ വീഡിയോ പുറത്ത് വന്നത്. ഈ ഗാനമായിരിക്കാം റിലീസ് ചെയ്യുന്നത് എന്നാണ് സൂചന.
സെവന്‍ സ്‌ക്രീന്‍ സ്റ്റുഡിയോ, ദി റൂട്ട് എന്നിവയുടെ ബാനറുകളില്‍ ലളിത് കുമാറും ജഗദീഷ് പളനിസാമിയും ചേര്‍ന്നാണ് ഈ ചിത്രം നിര്‍മ്മിക്കുന്നത്. തൃഷ, പ്രിയ ആനന്ദ്, അര്‍ജുന്‍ സര്‍ജ, സഞ്ജയ് ദത്ത്, ഗൗതം മേനോന്‍, മിഷ്‌കിന്‍, മന്‍സൂര്‍ അലി ഖാന്‍, സാന്‍ഡി, ജനനി, അഭിരാമി വെങ്കിടാചലം, മലയാളി താരങ്ങളായ മാത്യു തോമസ്, ബാബു ആന്റണി എന്നിവരുംചിത്രത്തില്‍ അഭിനയിക്കുന്നുണ്ട്.
ചിത്രത്തിനായി സംഗീതം ഒരുക്കുന്നത് അനിരുദ്ധ് ആണ്. ഡി ഒപി മനോജ് പരമഹംസ, ആക്ഷന്‍ നിർവഹിക്കുന്നത് അന്‍പറിവ് ആണ്. എഡിറ്റിങ് ഫിലോമിന്‍ രാജ്, ആര്‍ട്ട് എന്‍. സതീഷ് കുമാര്‍, കൊറിയോഗ്രാഫി നിർവഹിക്കുന്നത് ദിനേഷ്. ഒക്ടോബര്‍ 19 ന് ലോകമെമ്പാടും ലിയോ റിലീസ് ചെയ്യും.
