അടുത്തിടെയാണ് നടി മഞ്ജു വാര്യർ ബിഎംഡബ്ല്യു 1250 ജിഎസ് എന്ന ആഡംബര ബൈക്ക് സ്വന്തമാക്കിയത്. ഇപ്പോഴിതാ ഈ ബൈക്കിൽ യാത്ര ചെയ്യുന്ന മഞ്ജു വാരിയരുടെ ചിത്രത്തിന് നവ്യ നായർ നൽകിയ കമന്റ് സമൂഹമാധ്യമങ്ങളിൽ വൈറലാവുകയാണ്. ബൈക്കിൽ യാത്ര ചെയ്യുന്ന ചിത്രം നടി സമൂഹ മാധ്യമങ്ങളിൽ പങ്കുവച്ചതിന് പിന്നാലെ അൽഫോൻസ് പുത്രൻ, ശിവദ, ഗീതു മോഹൻദാസ് തുടങ്ങി നിരവധി താരങ്ങളും കമന്റുകളുമായി എത്തിയിരുന്നു.
സമ്മതിച്ചു ചേച്ചീ. ഇതൊക്കെ കാണുമ്പോൾ എന്നെയൊക്കെ എടുത്ത് കിണറ്റിൽ ഇടാൻ എനിക്കു തന്നെ തോന്നുന്നു എന്നായിരുന്നു നവ്യ കുറിച്ചത്. മഞ്ജു വാരിയർ എല്ലാവർക്കും പ്രചോദനമാണ്. സ്വപ്നങ്ങൾക്കു ചിറകുമുളയ്ക്കുന്നത് പോലെ തോന്നുന്നു. വാനോളം ഉയരട്ടെ. നിങ്ങളെ ഓർത്ത് അഭിമാനിക്കുന്നു എന്നൊക്കെയാണ് പ്രേക്ഷകരും മറ്റ് താരങ്ങളും കമന്റ് ചെയ്യുന്നത്. താരത്തിന്റെ വാഹന പ്രണയം എന്നും ചർച്ചാ വിഷയമാണ്. അടുത്തിടെ ബൈക്ക് ഓടിക്കാൻ പരിശീലനം നേടിയ മഞ്ജുവിന്റെ റൈഡിങ് വിഡിയോകളും ചിത്രങ്ങളും വൈറലായിരുന്നു.
തമിഴ് നടൻ അജിത് കുമാർ നായകനായെത്തിയ ‘തുനിവ്‌’ എന്ന തമിഴ് ചിത്രത്തിന്റെ ഷൂട്ടിങ്ങിനിടെ അജിത്തിനൊപ്പം മഞ്ജുവും ലഡാക്കിൽ ബൈക്ക് റൈഡിനു പോയിരുന്നു. അന്ന് അജിത്ത് ഓടിച്ചിരുന്ന ബൈക്കിന്റെ അതെ സീരീസിൽപെട്ട ബിഎംഡബ്ല്യു ബൈക്ക് ആണ് ഇപ്പോൾ മഞ്ജുവും സ്വന്തമാക്കിയത്.
