ഖത്തര്‍ എയര്‍വേയ്‌സിന്റെ പുതിയ ദീര്‍ഘദൂര വിമാനങ്ങളില്‍ ഫസ്റ്റ് ക്ലാസ് സീറ്റുകള്‍ ഉണ്ടാവില്ലെന്ന് റിപ്പോർട്ട്‌. ഫസ്റ്റ് ക്ലാസുകളിലേത് പോലെ തന്നെ എല്ലാവിധ സൗകര്യങ്ങളുമുള്ളതിനാല്‍ കൂടുതല്‍ പേരും ബിസിനസ് ക്ലാസ് എടുക്കുന്നതും ഫസ്റ്റ് ക്ലാസ് സീറ്റുകള്‍ക്ക് ആവശ്യക്കാര്‍ കുറഞ്ഞു തുടങ്ങിയതുമാണ് ഇത് ഒഴിവാക്കാന്‍ കാരണം. ഇസ്‌താംബൂളിൽ നടത്തിയ അഭിമുഖത്തില്‍ ഖത്തര്‍ എയര്‍വേയ്‌സ് സിഇഒ അക്ബര്‍ അല്‍ ബേക്കര്‍ ആണ് ഇക്കാര്യം വ്യക്തമാക്കിയത്.
ഖത്തര്‍ എയര്‍വേയ്‌സിന്റെ പ്രത്യേകം രൂപകല്‍പന ചെയ്ത ക്യൂ സ്യൂട്ട് എന്ന ബിസിനസ് ക്ലാസിനാണ് ഫസ്റ്റ് ക്ലാസിനെക്കാള്‍ കൂടുതല്‍ ഭാവിയെന്നും അല്‍ ബേക്കര്‍ കൂട്ടിച്ചേർത്തു. ഖത്തര്‍ എയര്‍വേയ്‌സ് ഓര്‍ഡര്‍ ചെയ്തിട്ടുള്ള 25 വിമാനങ്ങളില്‍ 10 എണ്ണം മാത്രമാണ് ഈ വര്‍ഷം നിര്‍മാണ കമ്പനികള്‍ ഡെലിവറി ചെയ്യുക. കൂടാതെ വരും വര്‍ഷങ്ങളില്‍ ബോയിങ് 777-9 എസ് ഉള്‍പ്പെടെയുള്ള പുതിയ വിമാനങ്ങളില്‍ ഫസ്റ്റ് ക്ലാസ് സീറ്റുകള്‍ ഉള്‍പ്പെടുത്തേണ്ട എന്നാണ് തീരുമാനമെന്നും അല്‍ബേക്കര്‍ വ്യക്തമാക്കി.
അതേസമയം ദീര്‍ഘദൂര വിമാനങ്ങളിലെ ഫസ്റ്റ് ക്ലാസ് സീറ്റുകളുടെ കാര്യത്തില്‍ വ്യത്യസ്ത സമീപനങ്ങളാണ് മിക്ക എയര്‍ലൈനുകളും സ്വീകരിക്കുന്നത്. ചില വലിയ നിക്ഷേപം നടത്തുമ്പോള്‍ മറ്റ് ചില എയര്‍ലൈനുകള്‍ ബിസിനസ് ക്ലാസിലാണ് കൂടുതല്‍ നിക്ഷേപം നടത്തുക. അതുകൊണ്ടു തന്നെ ബിസിനസ് ക്ലാസുകളുടെ ഗുണനിലവാരവും സൗകര്യങ്ങളും ഗണ്യമായി മെച്ചപ്പെട്ടിട്ടുണ്ടെന്നാണ് റിപ്പോർട്ടുകൾ.
