എഴുതാത്ത പരീക്ഷ ജയിച്ചതായി കാണിച്ച് മാർക്ക് ലിസ്റ്റ് പ്രസിദ്ധീകരിച്ചതുമായി ബന്ധപ്പെട്ട വിവാദത്തില്‍ പ്രതികരണവുമായി എസ്.എഫ്.ഐ സംസ്ഥാന സെക്രട്ടറി പി.എം.ആര്‍ഷോ. ആർക്കിയോളജി മൂന്നാം സെമസ്റ്ററിലെ പരീക്ഷ താൻ എഴുതിയിട്ടില്ലെന്നാണ് ആർഷോ മാധ്യമങ്ങളോട് പറഞ്ഞത്. ഇതിന് പിന്നാലെ ഫലം വെബ്സൈറ്റിൽ നിന്നും മഹാരാജാസ് കോളേജ് പിൻവലിച്ചു.
“എംഎ ആർക്കിയോളജി മൂന്നാം സെമസ്റ്ററിലെ ഒരു പരീക്ഷപോലും ഞാൻ എഴുതിയിട്ടില്ല. പരീക്ഷ നടക്കുന്ന ദിവസങ്ങളിൽ ഞാൻ എറണാകുളം ജില്ലയിലില്ല. കേസ് മൂലം ജില്ലയിൽ പ്രവേശിക്കാൻ കഴിയുമായിരുന്നില്ല. പാസായെന്ന ഫലം എങ്ങനെ വന്നുവെന്ന് അറിയില്ല. താൻ കണ്ടിട്ടുമില്ല.
എഴുതാത്ത പരീക്ഷ വിജയിപ്പിക്കേണ്ട ചുമതല ആർക്കും കൊടുത്തിട്ടില്ല. അങ്ങനെ വിജയിക്കേണ്ട ആവശ്യമില്ല. സംഭവിച്ചത് സാങ്കേതിക പിശകാ‍ണോ ബോധപൂർവമാണോ എന്നു പരിശോധിക്കണം” എന്ന് ആർഷോ പറഞ്ഞു.
ആർക്കിയോളജി മൂന്നാം സെമസ്റ്ററിലെ പരീക്ഷയുടെ റിസൾട്ട് മാർച്ചിലാണ് പുറത്തുവന്നത്. ആർഷോയുടെ മൂന്നാം സെമസ്റ്റർ ആർക്കിയോളജിയുടെ മാർക്ക് ലിസ്റ്റിൽ മാർക്ക് ‘പൂജ്യം’ എന്നാണുള്ളതെങ്കിലും “പാസ്ഡ്’ എന്നും രേഖപ്പെടുത്തിയിട്ടുണ്ട്. ഇതാണ് വിവാദമായത്.
