യുഎഇയിൽ ഒപ്പം താമസിച്ചിരുന്നയാളെ കൊലപ്പെടുത്തിയ ശേഷം രക്ഷപ്പെടാൻ ശ്രമിച്ച പ്രവാസി അറസ്റ്റിൽ. പ്രതി ഏത് രാജ്യക്കാരനാണെന്ന വിവരം പൊലീസ് വെളിപ്പെടുത്തിയിട്ടില്ല. അജ്‍മാനിലായിരുന്നു സംഭവം. സാമ്പത്തിക തർക്കങ്ങളും മുറിയിൽ വെച്ചുണ്ടായ വാക്ക് തർക്കങ്ങളുമാണ് കൊലപാതകത്തിൽ കലാശിച്ചതെന്ന് അജ്‍മാൻ പൊലീസ് കണ്ടെത്തിയിട്ടുണ്ട്.
അജ്‍മാൻ ഇൻഡസ്ട്രിയൽ ഏരിയയിൽ തൊഴിലാളികൾ താമസിക്കുന്ന സ്ഥലത്തെ ഒരു മുറിയിൽ നിന്ന് ദുർഗന്ധം വമിക്കുന്നെന്ന വിവരത്തിന്റെ അടിസ്ഥാനത്തിലാണ് പൊലീസ് സ്ഥലത്തെത്തിയതെന്ന് അജ്‍മാൻ പൊലീസ് ഇൻവെസ്റ്റിഗേഷൻസ് ആന്റ് ക്രിമിനൽ ഇൻവെസ്റ്റിഗേഷൻസ് വകുപ്പ് മേധാവി ക്യാപ്‍റ്റൻ അഹ്‍മദ് അൽ നുഐമി പറഞ്ഞു. പൊലീസ് മുറി തുറന്ന് നടത്തിയ പരിശോധനയിലാണ് മൃതദേഹം കണ്ടെത്തിയത്.
60 വയസുകാരനായ ഏഷ്യക്കാരനാണ് കൊല്ലപ്പെട്ടതെന്ന് പൊലീസ് തിരിച്ചറിഞ്ഞു. പരിസരത്ത് താമസിച്ചിരുന്നവരുടെ മൊഴികൾ അടിസ്ഥാനപ്പെടുത്തി പൊലീസ് അന്വേഷണം തുടങ്ങി.
