ഈ വർഷത്തെ ഹജ്ജ് സീസണിന്റെ പ്രവർത്തന പദ്ധതി പ്രഖ്യാപിച്ച് ഹോളി മോസ്‌ക് അഫയേഴ്‌സിന്റെ പ്രസിഡൻസി. ഹജ്ജ്, ഉംറ മന്ത്രി ഡോ. തൗഫീഖ് ബിൻ ഫൗസാൻ അൽ റബിയയുടെ സാന്നിധ്യത്തിൽ പ്രസിഡൻസി മേധാവി ഡോ. അബ്ദുൽറഹ്മാൻ ബിൻ അബ്ദുൽ അസീസ് അൽ സുദൈസാണ് വിപുലമായ പ്രവർത്തന പദ്ധതി പ്രഖ്യാപിച്ചത്.
സൗദി വിഷൻ 2030 അടിസ്ഥാനമാക്കിയുള്ള ഹജ്ജ് 1444 AH-ലെ പ്രസിഡൻസിയുടെ തന്ത്രപരമായ ലക്ഷ്യങ്ങളുമായി ബന്ധപ്പെട്ട നിരവധി പ്രവർത്തനങ്ങളിലാണ് ഈ പദ്ധതി ശ്രദ്ധ കേന്ദ്രീകരിക്കുന്നത്. കൊറോണ മഹാമാരി അവസാനിച്ച് ഹജ്ജ് തീർഥാടകരുടെ മടങ്ങിവരവ് പ്രഖ്യാപിച്ചതിന് ശേഷം ഈ വർഷത്തെ ഹജ്ജ് സീസണിലെ പ്രവർത്തന പദ്ധതി പ്രസിഡൻസിയുടെ ചരിത്രത്തിലെ ഏറ്റവും വലിയ പദ്ധതിയാണെന്ന് മീഡിയ ഫോറത്തിലെ തന്റെ ഉദ്ഘാടന പ്രസംഗത്തിൽ അൽ-സുദൈസ് പറഞ്ഞു,
രണ്ട് വിശുദ്ധ മസ്ജിദുകളുടെ സംരക്ഷകൻ സൽമാൻ രാജാവിന്റെയും കിരീടാവകാശിയുടെയും നേതൃത്വത്തിലുള്ള സർക്കാരിന്റെ നിർദ്ദേശങ്ങളാൽ രൂപപ്പെടുത്തിയ മികച്ച വിജയങ്ങളുടെയും ദീർഘകാല നേട്ടങ്ങളുടെയും വിപുലീകരണമാണ് പദ്ധതിയെന്നും അദ്ദേഹം കൂട്ടിച്ചേർത്തു. സന്നദ്ധപ്രവർത്തനത്തിലും മാനുഷിക പ്രവർത്തനത്തിലും, ഹജ്ജ് സീസണിൽ പ്രസിഡൻസി രണ്ട് ഹോളി മോസ്‌കുകളിലായി പത്ത് മേഖലകളിലായി 8,000-ലധികം വോളണ്ടിയർ അവസരങ്ങളും 200,000-ലധികം സന്നദ്ധ സേവനങ്ങളും നൽകിയതായി അൽ-സുദൈസ് പറഞ്ഞു. രണ്ട് വിശുദ്ധ മസ്ജിദുകളുടെ മാർഗനിർദേശക പങ്ക് വർദ്ധിപ്പിക്കുന്നതിന്, 49 സ്റ്റേഷനുകളിലായി 51 അന്താരാഷ്ട്ര ഭാഷകളിൽ തീർഥാടകർക്ക് വിവർത്തന സേവനങ്ങളും സ്ഥലപരമായ മാർഗ്ഗനിർദ്ദേശങ്ങളും വിവരങ്ങളും പ്രസിഡൻസി നൽകുന്നുവെന്ന് അദ്ദേഹം ഊന്നിപ്പറഞ്ഞു.
