63 ആം പിറന്നാൾ ദിനത്തിൽ മലയാളത്തിന്റെ താര രാജാവിന് സർപ്രൈസ് സമ്മാനങ്ങളുടെ പെരുമഴ. നിരവധി പ്രമുഖരും താരത്തിന് ആശംസകളുമായെത്തി. നിരവധി പേർ ലാലിനൊപ്പമുള്ള ഓർമകളും പങ്കുവച്ചു. താരത്തിന് ആദ്യം ജന്മദിനാശംസകൾ നേർന്നത് മലയാളത്തിന്റെ മെഗാ സ്റ്റാർ മമ്മൂട്ടിയാണ്. അർധരാത്രി കൃത്യം 12 മണിക്ക് മമ്മൂട്ടി പ്രിയപ്പെട്ട ലാലുവിന് ജന്മദിനാശംസകൾ നേർന്നു. ഇരുവരും ഒരുമിച്ച് കൈകോർത്ത് നിൽക്കുന്ന ചിത്രം പങ്കുവച്ചായിരുന്നു മമ്മൂട്ടി ആശംസകൾ നേർന്നത്.
‘പ്രിയപ്പെട്ട മോഹൻലാലിന് ജന്മദിനാശംസകൾ’ എന്ന് താരത്തിന്റെ ചിത്രത്തിനോടൊപ്പം കേരള മുഖ്യമന്ത്രി പിണറായി വിജയനും കുറിച്ചു. അതേസമയം പ്രിയ്യ നടന്റെ പിറന്നാൾ ദിനത്തിൽ അദ്ദേഹത്തിന് 72 ലക്ഷം രൂപയുടെ ആഡംബര കാർ സമ്മാനിച്ചാണ് ഹെഡ്ജ് ഉടമ അലക്സ് കെ ബാബു പിറന്നാൾ ആശംസകൾ അറിയിച്ചത്. ഇന്ന് ഉച്ചയോടെ കിയ ഷോറൂം അധികൃതർ താരത്തിന്റെ വീട്ടിലെത്തി കാർ സമ്മാനിച്ചു. കാർ ഏറ്റുവാങ്ങുമ്പോൾ മോഹൻലാലിനും ഭാര്യ സുചിത്രയ്ക്കുമൊപ്പം മേജർ രവി, ഷിബു ബേബി ജോൺ എന്നിവരും ഉണ്ടായിരുന്നു. ജൂൺ രണ്ട് ന് പുറത്തിറക്കിയ കിയ ഇവി6 എന്ന പുത്തൻ മോഡലാണ് അലക്സ് പ്രിയ സുഹൃത്തിന് സമ്മാനിച്ചിരിക്കുന്നത്. 3.5 സെക്കൻഡിൽ 100 കി.മി സ്പീഡ് കൈവരിക്കാൻ സാധിക്കുന്ന ഈ വാഹനത്തിന്റെ പവൻ 323 ബിഎച്ച്പിയാണ്. ഇലക്ട്രിക് വാഹനമായ കിയ ഇവി6ന് 19 മിനിറ്റിൽ 80% ചാർജ് കയറും എന്ന പ്രത്യേകതയുമുണ്ട്.
അതേസമയം മോഹൻലാലിന്റെ പിറന്നാൾ ദിനത്തിൽ ഒരു ഓർമകുറിപ്പുമായി സംവിധായകൻ പത്മരാജന്റെ മകൻ അനന്തപത്മനാഭനുമെത്തി. തൂവാനത്തുമ്പികൾ എന്ന സിനിമയുടെ ഷൂട്ടിങ് നടക്കുന്ന സമയത്തുണ്ടായ സംഭവങ്ങളാണ് അനന്തപത്മനാഭൻ പങ്കുവച്ചത്. തൂവാനത്തുമ്പികളുടെ ഷൂട്ടിംഗ് സെറ്റിൽ മോഹൻലാലിന്റെ അമ്മ വന്ന അപൂർവ സംഭവത്തെപ്പറ്റി അനന്തപത്മനാഭൻ ഓർമിച്ചെടുത്തു. ഷോട്ടിനിടയിൽ അമ്മയോട് മോഹൻലാൽ വന്ന് കുസൃതി പറഞ്ഞ് പോവാറുണ്ടെന്നും അദ്ദേഹം കുറിച്ചു. നിരവധി ആരാധകരാണ് കുറിപ്പിന് പ്രതികരണവുമായി എത്തിയത്.
പെട്ടി ചുമക്കുന്ന, ഇസ്തിരിയിടുന്ന, പാചകം ചെയ്യുന്ന ഒരു സൂപ്പർ സ്റ്റാർ ഉണ്ടെങ്കിൽ അത് മോഹൻലാൽ മാത്രമാണെന്ന് നടി ലിസി പറഞ്ഞു. ഇങ്ങനെയൊരു നടനെ ജീവിതത്തിൽ വേറെ കണ്ടിട്ടില്ലെന്നും താരം കൂട്ടിച്ചേർത്തു. അതേസമയം എക്കാലത്തെയും മികച്ച സംവിധായകരിൽ ഒരാളായ മണിരത്നം ഇരുവർ എന്ന സിനിമയിലെ ലാലുമൊത്തുള്ള അനുഭവങ്ങളാണ് പങ്കുവച്ചത്. നിരവധി വിപുലമായ ഷോട്ടുകൾ സിനിമയിൽ ഉണ്ടായിരുന്നു. മുൻകൂട്ടി തീരുമാനിച്ച് വയ്ക്കുന്ന പല ഷോട്ടുകളും ഷൂട്ട് ചെയ്യുമ്പോൾ മോഹൻലാൽ വന്ന് പറയും, ഷോട്ട് ഇങ്ങനെയാവണമെന്ന് ഒരിക്കലും നൂറുശതമാനം ഫിക്സ് ചെയ്ത് വെക്കരുത്. ഹാപ്പി ആക്സിഡന്റ് എന്നാണ് അദ്ദേഹം അതിനെ വിളിച്ചത്. അപ്രതീക്ഷിതമായി സംഭവിക്കട്ടെയെന്നാണ് അതിനർത്ഥം. പലപ്പോഴും മുൻകൂട്ടി തീരുമാനിക്കാതെയുള്ള അദ്ദേഹത്തിന്റെ മാജിക് കാണാൻ സാധിച്ചുവെന്നും മണിരത്നം കുറിച്ചു.
നടക്കുന്നതിനിടയിൽ പെട്ടെന്ന് മുണ്ട് അഴിയുകയാണെങ്കിൽ അതുവരെ പ്ലാൻ ചെയ്യാത്ത എന്തെങ്കിലും ആക്ഷൻ ലാൽ അവതരിപ്പിക്കും. ഒരാൾ പെട്ടെന്ന് തെറ്റി കുറുകേ വരികയാണെങ്കിൽ നടത്തം നിർത്തി മാറി നടക്കേണ്ടതായി വരും എന്നൊക്കെ മോഹൻലാൽ അന്ന് പറഞ്ഞ കാര്യങ്ങൾ ഓർക്കുന്നു. അഭിനയത്തിൽ മോഹൻലാൽ പുലർത്തുന്ന സ്വാഭാവികതയും ഡീറ്റെയിലിങ്ങുമാണ് മണിരത്നം എടുത്ത് പറഞ്ഞത്.
മോഹൻലാലിന്റെ ജീവിതപങ്കാളിയായ സുചിത്രയ്ക്ക് എല്ലാവരിൽ നിന്നും വ്യത്യസ്തമായ മോഹൻലാലിനെ കുറിച്ചായിരുന്നു പറയാൻ ഉണ്ടായിരുന്നത്. ക്യാമറയ്ക്ക്‌ മുന്നിൽ ഒന്നാന്തരം നടൻ ആണെങ്കിലും ജീവിതത്തിൽ അഭിനയിക്കാൻ അറിയില്ല. ജീവിതത്തിൽ വളരെ മോശം നടനാണദ്ദേഹം. അഭിനയിക്കുകയാണെങ്കിൽ അത് നമുക്ക് പെട്ടെന്ന് മനസിലാവുകയും ചെയ്യുമെന്ന് സുചിത്ര പറഞ്ഞു. അദ്ദേഹം വളരെ ഇമോഷണലാണ്. എന്നാൽ അതൊരു മാജിക്കുകാരനെ പോലെ ഒളിപ്പിച്ചു വയ്ക്കാനുള്ള കഴിവുമുണ്ട്.
മോഹൻലാലിന് വളരെ പ്രത്യേകത നിറഞ്ഞ സമ്മാനമാണ് ഏഷ്യാനെറ്റില്‍ നിന്ന് ലഭിച്ചത്. ബിഗ് ബോസ് മലയാളം സീസണ്‍ അഞ്ച് വേദിയില്‍ വെച്ചായിരുന്നു ആ വേറിട്ട സമ്മാനം. മോഹൻലാലിന്റെ കയ്യക്ഷരം ഇനി ഡിജിറ്റല്‍ ഫോണ്ട് രൂപത്തില്‍ ലഭ്യമാകും എന്ന പ്രഖ്യാപനമാണ് ബിഗ് ബോസ് വേദിയിൽ നടന്നത്. ‘ A 10’ എന്നായിരിക്കും ഈ സിഗ്നേച്ചർ ഫോണ്ട് അറിയപ്പെടുക എന്നും ബിഗ് ബോസ് വേദിയില്‍ ഏഷ്യാനെറ്റിന്റെ മാനേജിങ് ഡയറക്ടർ മാധവൻ പ്രഖ്യാപിച്ചു.
ഒരുപാട് സർപ്രൈസുകൾ താരത്തെ തേടിയെത്തിയപ്പോൾ മോഹൻലാൽ മറ്റൊരാൾക്ക് പിറന്നാൾ ദിനത്തിൽ സർപ്രൈസ് നൽകുകയും ചെയ്തു. പ്രളയത്തിൽ അകപ്പെട്ട ഒട്ടനവധി സഹജീവികളെ രക്ഷിക്കാൻ രക്ഷാപ്രവർത്തനത്തിൽ ഏർപ്പെടുന്നതിനിടെ ജീവൻ നഷ്ടപ്പെട്ട ലിനുവിന്റെ കുടുംബത്തിന് വീട് വച്ച് നൽകിയാണ് മോഹൻലാൽ എന്ന മനുഷ്യ സ്നേഹി 63 ആം പിറന്നാൾ ആഘോഷിച്ചത്. ലിനുവിന്റെ കുടുംബത്തിന് പുതിയ വീടിന്റെ താക്കോൽ മോഹൻലാലും ഭാര്യ സുചിത്ര മോഹൻലാലും ചേർന്ന് കൈമാറി. ചടങ്ങിൽ വിശ്വശാന്തി മാനേജിംഗ് ഡയറക്ടർ മേജർ രവി, ഡയറക്ടർ സജീവ് സോമൻ, ആന്റണി പെരുമ്പാവൂർ എന്നിവരും പങ്കെടുത്തു. നിരവധി പ്രമുഖരും താരത്തിന് പിറന്നാൾ ആശംസകളുമായി എത്തിയിരുന്നു.
മഞ്ഞിൽ വിരിഞ്ഞ പൂവിലെ നരേന്ദ്രനിൽ തുടങ്ങി എലോണിലെ കാളിദാസ് വരെ എത്തി നിൽക്കുന്ന നടന ഇതിഹാസം മലയാളികൾക്ക് സ്വന്തം കുടുംബത്തിലെ അംഗത്തെ പോലെയാണ്. വില്ലനിലൂടെ സിനിമയിൽ അരങ്ങേറ്റം കുറിച്ച് ഇപ്പോൾ ബറോസ് എന്ന ചിത്രത്തിലൂടെ സംവിധായകന്റെ കുപ്പായം കൂടി അണിയുകയാണ് അദ്ദേഹം. പ്രേക്ഷക മനസ്സ് കീഴടക്കുന്ന, അഭിനയ മുഹൂർത്തങ്ങൾ കൊണ്ട് തിയ്യറ്ററുകളെ പ്രകമ്പനം കൊള്ളിക്കുന്ന, തലയെടുപ്പുള്ള കഥാപാത്രങ്ങൾ ഇനിയും താര രാജാവിന് ലഭിക്കട്ടെ. അഭിനയ പ്രതിഭയ്ക്ക് 63 ആം പിറന്നാൾ ആശംസകൾ.
