മോഹൻലാലിന്റെ പിറന്നാൾ ദിനത്തിൽ ആരാധകർക്ക്‌ സർപ്രൈസ്. ‘മലൈക്കോട്ടൈ വാലിബൻ സിനിമയിൽ നിന്നുള്ള മോഹൻലാലിന്റെ മാത്രമായ ടീസർ ആണ് അണിയറ പ്രവർത്തകർ പുറത്തുവിട്ടത്. തലയിൽ കുടുമയും കയ്യിൽ വലിയ ടാറ്റൂവുമുള്ള വാലിബൻ ലുക്കിൽ വടവുമായി മുന്നേറുന്ന മോഹൻലാലിനെ ടീസറിൽ കാണാം.
ലിജോ ജോസ് പെല്ലിശ്ശേരിയാണ് ചിത്രം സംവിധാനംചെയ്യുന്നത്. അടുത്തിടെയാണ് രാജസ്ഥാനിലെ വാലിബന്‍റെ ഷെഡ്യൂള്‍ അവസാനിച്ചത്. നിലവിൽ ചെന്നൈയിൽ നടക്കുംനാ ചിത്രീകരണവും പുരോഗമിക്കുകയാണ്. ലിജോയുടെ കരിയറിലെ ഏറ്റവും വലിയ കാന്‍വാസില്‍ ഒരുങ്ങുന്ന സിനിമ എന്ന പ്രത്യേകതയും ചിത്രത്തിനുണ്ട്. പ്രശാന്ത് പിള്ളയാണ് ചിത്രത്തിന്റെ സംഗീത സംവിധാനം നിർവഹിക്കുന്നത്.
മധു നീലകണ്ഠനാണ് ചിത്രത്തിന്റെ ഛായാഗ്രഹണം. റോണക്സ് സേവ്യര്‍ വസ്ത്രാലങ്കാരം നിർവഹിക്കുന്നു. മറാഠി നടി സൊണാലി കുല്‍ക്കര്‍ണി, രാജീവ് പിള്ള, ഹരീഷ് പേരടി, മണികണ്ഠൻ ആചാരി, ഡാനിഷ്, ഹരിപ്രശാന്ത് വര്‍മ തുടങ്ങിയവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. ഷിബു ബേബി ജോണിന്‍റെ ജോണ്‍ ആന്‍ഡ് മേരി ക്രിയേറ്റീവിനൊപ്പം മാക്സ് ലാബ് സിനിമാസ്, സെഞ്ച്വറി ഫിലിംസ് എന്നിവരും ചേർന്നാണ് ചിത്രത്തിന്റെ നിർമാണം.
