റോഡ് സുരക്ഷ ഉറപ്പുവരുത്തുന്നതിന്റെ ഭാഗമായി ട്രാഫിക് നിയമങ്ങൾ കർശനമാക്കാനും ബോധവത്കരണ പരിപാടികൾ സംഘടിപ്പിക്കാനും യുഎഇ തീരുമാനിച്ചു. അതിന്റെ ഭാഗമായി ഇനി മുതൽ കാൽനട ക്രോസിംഗുകളിൽ വാഹനം പാർക്ക് ചെയ്താൽ 500 ദിർഹം പിഴ ചുമത്തുകയും ഡ്രൈവിംഗ് ലൈസൻസിൽ ആറ് ബ്ലാക്ക് പോയിന്റുകൾ ചേർക്കുകയും ചെയ്യും.
റോഡ് മുറിച്ചുകടക്കുമ്പോൾ കാൽനടയാത്രക്കാർക്ക് അപകടം സംഭവിക്കുന്ന സാഹചര്യത്തിലാണ് ഈ തീരുമാനം. കാൽനടയാത്രക്കാർക്ക് ക്രോസിംഗിനായി നിശ്ചയിച്ചിട്ടുള്ള സ്ഥലങ്ങളിൽ മുൻഗണന നൽകേണ്ടതുണ്ട്. എന്നാൽ പല ഡ്രൈവർമാരും നിയുക്ത കാൽനട ക്രോസിംഗുകളിൽ, പ്രത്യേകിച്ച് വാണിജ്യ, വ്യാവസായിക മേഖലകളിൽ വാഹനം നിർത്താൻ തയ്യാറാകാറില്ല. അങ്ങനെയുള്ളവർക്ക് കാൽനടയാത്രക്കാർക്ക് വഴിയുടെ അവകാശം നൽകേണ്ടതിന്റെ പ്രാധാന്യത്തേക്കുറിച്ചും അവരുടെ സുരക്ഷയേക്കുറിച്ചും അവബോധം നൽകുന്നതിനായി ബോധവത്കരണ പരിപാടികളും നടത്തും. ഇതിന്റെ ഭാഗമായി ട്രാഫിക് പട്രോളിംഗ് ഊർജ്ജിതമാക്കാനാണ് നീക്കം.
ഉം അൽ ഖുവൈൻ പോലീസിലെ ട്രാഫിക് ആൻഡ് പട്രോൾസ് ഡിപ്പാർട്ട്‌മെന്റിന്റെ ട്രാഫിക് അവേർനെസ് ആൻഡ് ഇൻഫർമേഷൻ ബ്രാഞ്ചാണ് ബോധവത്കരണ കാമ്പയിൻ ആരംഭിച്ചത്. എല്ലാ റോഡ് ഉപയോക്താക്കൾക്കിടയിലും ട്രാഫിക് അവബോധം പ്രോത്സാഹിപ്പിക്കുക, ട്രാഫിക് നിയമങ്ങൾ പാലിക്കേണ്ടതിന്റെ പ്രാധാന്യം തിരിച്ചറിയിക്കുക, സുരക്ഷിതമായി റോഡ് മുറിച്ചുകടക്കാനുള്ള അവകാശങ്ങൾ ഊന്നിപ്പറയുക എന്നിവയാണ് കാമ്പയിനിലൂടെ ലക്ഷ്യമിടുന്നത്.
