മുഖ്യമന്ത്രി പിണറായി വിജയൻ ആഭ്യന്തര വകുപ്പ് ഒഴിയണമെന്ന് കേന്ദ്ര മന്ത്രി വി മുരളീധരൻ. എകെജി സെന്ററിന് നേരെ ആക്രമണം നടന്നത് ഭരണസിരാകേന്ദ്രത്തിന്റെ മൂക്കിന് കീഴെയാണ്. മുഖ്യമന്ത്രി പൊലീസുകാരുടെ മനോവീര്യം തകർക്കുകയാണ്. താൻ ആണ് കേരളം ഭരിച്ചിരുന്നതെങ്കിൽ ഇത്തരം സംഭവം ഉണ്ടാകില്ലെന്നും കേന്ദ്രമന്ത്രി വി മുരളീധരൻ വ്യക്തമാക്കി.
പൊലീസ് സംവിധാനത്തിന്റെ സമ്പൂർണ പരാജയമാണ് കാണുന്നത്. ഒരാൾ വന്ന് ബോംബ് എറിഞ്ഞു തിരിച്ച് പോകുന്നു. ഒരു വിവരവും പൊലീസിന് ലഭിക്കുന്നില്ല. അക്രമിയെ പിടികൂടാനും സാധിക്കുന്നില്ല. സെക്രട്ടേറിയറ്റിന്റെ മീറ്ററുകൾക്ക് അപ്പുറത്ത് ഇത്തരമൊരു സംഭവം നടക്കുമ്പോൾ കേരളാ പൊലീസിന്റെ സമ്പൂർണ പരാജയമാണ് വ്യക്തമാകുന്നത്. ഭരണകക്ഷിക്ക് അവരുടെ പാർട്ടി ഓഫീസുപോലും സംരക്ഷിക്കാൻ കഴിയാത്ത ഒരു ഭരണ സംവിധാനം എങ്ങനെ ജനങ്ങൾക്ക് സംരക്ഷണം നൽകുമെന്നും വി മുരളീധരൻ ചോദിച്ചു.
ഇവരാണ് നരേന്ദ്ര മോദിക്ക് ഗുജാത്ത് കലാപം ചെറുക്കാൻ സാധിച്ചില്ല, യോഗി ആദിത്യനാഥ് രാജ്യത്തെ ക്രമസമാധാന നില സംരക്ഷിക്കുന്നതിൽ പരാജയപ്പെട്ടു എന്നൊക്കെ ജനങ്ങൾക്ക് ക്ലാസ്സെടുക്കുന്നത്. മുഖ്യമന്ത്രി ആഭ്യന്തര വകുപ്പ് ഒഴിഞ്ഞ് മറ്റാരെയെങ്കിലും ഏൽപ്പിക്കണം. കേരളത്തിലെ ജനങ്ങൾക്ക് വഴിയെ നടക്കാൻ കഴിയാത്ത സ്ഥിതിയാണ്. ജനങ്ങൾക്ക് സമാധാനം ആണ് വേണ്ടതെന്നും പൊലീസ് കേസ് അന്വേഷിച്ച് നടപടിയെടുക്കണമെന്നും വി മുരളീധരൻ പറഞ്ഞു.
