ബിജെപി അംഗത്വം രാജിവെച്ച് നടി ഗൗതമി. 25 വർഷത്തെ പാർട്ടിയുമായുള്ള ബന്ധമാണ് താരം ഉപേക്ഷിച്ചത്. പ്രതിസന്ധി ഘട്ടത്തിൽ പാർട്ടിയിൽ നിന്നും പിന്തുണ ലഭിച്ചില്ലെന്നും സീറ്റ് നൽകാതെ കബളിപ്പിച്ചുവെന്നും ആരോപിച്ചാണ് ഗൗതമി ബിജെപി വിട്ടത്.
സീറ്റ് നൽകാമെന്ന വാഗ്ദാനത്തെത്തുടർന്ന് രാജപാളയം നിയമസഭ മണ്ഡലത്തിന്റെ ചുമതല ഏറ്റെടുക്കുകയും താഴേത്തട്ട് മുതൽ പാർട്ടിയെ ശക്തിപ്പെടുത്തുന്നതിനായി കഠിനമായി താൻ പ്രയത്നിക്കുകയും ചെയ്തു. എന്നാൽ അവസാന നിമിഷം സീറ്റ് നൽകിയില്ലെന്ന് ഗൗതമി സമൂഹമാധ്യമമായ എക്സിൽ കുറിച്ചു.
സീറ്റ് നിഷേധിക്കപ്പെട്ടിട്ടും താൻ പാർട്ടിയിൽ തുടർന്നിരുന്നു. എന്നാൽ തൻ്റെ ജീവിതത്തിലെ പ്രതിസന്ധി ഘട്ടത്തിൽ പാര്ട്ടിയിൽ നിന്നും പിന്തുണ ലഭിച്ചില്ല. തന്റെ പക്കൽ നിന്നും ലക്ഷങ്ങൾ കബളിപ്പിച്ച് മുങ്ങിയ അളഗപ്പന് ബിജെപിയിലെ മുതിർന്ന നേതാക്കളുടെയടക്കം പിന്തുണയുണ്ട്. നീതിക്കായുള്ള തന്റെ പോരാട്ടം തുടരുമെന്നും നീതി നിർവഹണത്തിൽ തമിഴ്നാട് സർക്കാരിൽ വിശ്വാസമർപ്പിക്കുന്നുവെന്നും ഗൗതമി വ്യക്തമാക്കി.