ഖത്തറിൽ കമ്പനികളുടെ തൊഴിൽ കരാർ അറ്റസ്റ്റേഷൻ ഇനി ഓൺലൈൻ വഴി സാധ്യമാകും. ഇതിനായി തൊഴിൽ മന്ത്രാലയം ഇ-സേവനങ്ങളിൽ പുതിയ സൗകര്യം ഏർപ്പെടുത്തി. സ്വകാര്യ മേഖലയിലെ ജീവനക്കാർക്ക് തൊഴിൽ കരാർ ഓൺലൈനായി വെരിഫൈ ചെയ്യാനും അംഗീകരിക്കുകയോ നിരസിക്കുകയോ ചെയ്യാനുമുള്ള അനുമതിയോട് കൂടിയ ഏകീകൃത ഡിജിറ്റൽ പ്ലാറ്റ്ഫോം ഉൾപ്പെടെയാണ് നവീകരിച്ചത്.
കരാർ അറ്റസ്റ്റേഷൻ നടപടികൾ സുതാര്യമാക്കുന്നതോടൊപ്പം കമ്പനികൾക്ക് നൽകുന്ന സേവനങ്ങൾ വേഗത്തിലാക്കുകയാണ് ഇ- സേവനങ്ങളിലൂടെ അധികൃതർ ലക്ഷ്യമിടുന്നത്. നാഷണൽ ഒഥന്റിക്കേഷൻ സിസ്‌റ്റം മുഖേന ഐഡന്റിറ്റി വെരിഫിക്കേഷനായി സ്‌മാർട്ട് കാർഡുകളാണ് അറ്റസ്റ്റേഷന് വേണ്ടി കമ്പനികൾ ഉപയോഗിക്കേണ്ടത്.
ജോലിയുടെ സ്വഭാവത്തിനും സ്ഥാപനത്തിൻ്റെ ആവശ്യകതക്കും അനുസരിച്ച് അധിക കരാർ വ്യവസ്ഥകൾ ഉൾപ്പെടുന്ന പ്രത്യേക തൊഴിൽ (മെഡിക്കൽ, എൻജിനീയറിങ് പോലുള്ള ജോലികൾ) കരാറുകളുടെ അറ്റസ്റ്റേഷന് വേണ്ടിയാണ് പുതിയ ഇ-സേവനം ഏർപ്പെടുത്തിയത്. ഗാർഹിക തൊഴിലാളികളുടെ കരാറുകൾ ഓൺലൈൻ വഴി സർട്ടിഫൈ ചെയ്യുന്നതിനുള്ള സേവനം ഖത്തറിൽ അടുത്തിടെ ആരംഭിച്ചിരുന്നു.
