കണ്ണൂർ വളപട്ടണത്ത് കഴുത്തിൽ പെരുമ്പാമ്പ് ചുറ്റിയ ആളെ പെട്രോൾ പമ്പ് ജീവനക്കാർ സാഹസികമായി രക്ഷപെടുത്തി. വ്യാഴാഴ്ച രാത്രിയോടെയാണ് പാമ്പ് കഴുത്തിൽ ചുറ്റിയ നിലയിൽ ഇയാൾ പെട്രോൾ പമ്പിലെത്തിയത്. എന്നാൽ പാമ്പ് എങ്ങനെയാണ് ഇയാളുടെ കഴുത്തിൽ ചുറ്റിയതെന്ന് ഇതുവരെ വ്യക്തമല്ല. വീഡിയോ ഇപ്പോൾ സമൂഹമാധ്യമങ്ങളിൽ വൈറലാണ്.
എന്നാൽ ആദ്യം ഒന്ന് അമ്പരന്നെങ്കിലും പമ്പ് ജീവനക്കാർ ഉടൻ തന്നെ ചാക്ക് ഉപയോഗിച്ച് പാമ്പിനെ കഴുത്തിൽ നിന്ന് വേർപെടുത്തി. വളപട്ടണം പുഴയുടെ സമീപത്ത് വച്ചായിരുന്നു സംഭവം. ഇതിന് സമീപത്ത് നിന്ന് പാമ്പ് കഴുത്തിൽ കുടുങ്ങിയതാവാമെന്നാണ് കരുതുന്നത്. അതേസമയം മദ്യപിച്ചതിന് ശേഷം ഇയാൾ പാമ്പിനെ സാഹസികതയ്ക്കായി സ്വയം കഴുത്തിൽ ചുറ്റിയതാണോ അതോ പാമ്പ് തനിയെ കയറിയതാണോ എന്ന കാര്യം വ്യക്തമല്ല.
പെരുമ്പാമ്പിന്റെ വായ കൈകൊണ്ട് മുറുകെ പിടിച്ചായിരുന്നു ഇയാൾ പമ്പിലെത്തിയത്. വാല് കൊണ്ട് പാമ്പ് കഴുത്തിൽ മുറുകെ ചുറ്റുകയും ചെയ്തിരുന്നു. പാമ്പിന്റെ പിടിയിൽ മധ്യവയസ്‌കന്റെ കണ്ണുകൾ പുറത്തേക്ക് തള്ളി. ഇതിനെ തുടർന്ന് ശ്വാസം കിട്ടാതെ അപകടരമായ നിലയിലായിരുന്നു ഇയാൾ. എന്നാൽ പാമ്പിനെ കഴുത്തിൽ നിന്ന് വേർപെടുത്തിയ ഉടനെ തന്നെ ഇയാൾ സ്ഥലം വിട്ടതായി പമ്പ് ജീവനക്കാർ പറഞ്ഞു.
