കെഎസ്ആർടിസി ഡ്രൈവറുമായി നടുറോഡിൽ ഉണ്ടായ വാക്ക് തർക്കത്തിൽ തിരുവനന്തപുരം മേയർ ആര്യാ രാജേന്ദ്രനെതിരെ പോലീസ് കേസെടുക്കില്ല. ബസ് ട്രിപ്പ് മുടക്കി എന്നായിരുന്നു ഡ്രൈവർ യദു നൽകിയ പരാതി. എന്നാൽ ഡ്രൈവർ മോശമായി പെരുമാറിയെന്നാണ് പൊലീസ് പറയുന്നത്. കുറ്റം ചെയ്‌ത ഡ്രൈവർ യദുവിനെ മേയർ തടഞ്ഞുവയ്ക്കുകയായിരുന്നു എന്നാണ് പോലീസിന്റെ കണ്ടെത്തൽ. മേയർക്കെതിരെ കെഎസ്ആർടിസിയും പരാതി നൽകില്ല.
ഡ്രൈവർ യദു നൽകിയ പരാതിയിൽ കന്‍റോൺമെന്‍റ് പൊലീസ് ഇതുവരെ യാതൊരു നടപടിയും സ്വീകരിച്ചിട്ടില്ല. മേയർ നൽകിയ പരാതിയെ പ്രതിരോധിക്കാനാണ് ഡ്രൈവറുടെ പരാതി എന്നായിരുന്നു പൊലിസിന്‍റെ ന്യായം. ഇതുമായി ബന്ധപ്പെട്ട് യദുവിനെതിരെ അന്വേഷണം നടത്തുന്ന കെഎസ്ആർടിസി എംഡി ഇന്ന് മന്ത്രിക്ക് റിപ്പോർട്ട് നൽകും.
അതേസമയം, യദുവിനെ ജോലിയിൽ നിന്ന് പിരിച്ചുവിടേണ്ടെന്നും എന്നാൽ തൽക്കാലത്തേക്ക് മാറ്റി നിർത്താനുമാണ് ഗതാഗത വകുപ്പിന്റെ തീരുമാനം. പിരിച്ചുവിട്ടാൽ ജീവനക്കാർക്കിടയിൽ വ്യാപക പ്രതിഷേധം ഉണ്ടാകുമെന്നാണ് ഗതാഗത വകുപ്പിന്റെ നിഗമനം. എന്നാൽ, പൊലീസിന്‍റെ നടപടിയിൽ പ്രതിഷേധിച്ച് ടിഡിഎഫ്, കെഎസ്ആർടിസി ചീഫ് ഓഫീസിലേക്കും യൂത്ത് കോൺഗ്രസ് പ്രവർത്തകർ കന്‍റോൺമെന്‍റ് സ്റ്റേഷനിലേക്കും ഇന്ന് മാർച്ച് നടത്തിയത് ഏറെ ചർച്ചയായിട്ടുണ്ട്. മേയറുണ്ട് സൂക്ഷിക്കുക, എന്ന പോസ്റ്റർ കെ എസ് ആർ ടി സി ബസ്സുകളിൽ പതിപ്പിച്ചുകൊണ്ടായിരുന്നു പ്രതിഷേധം.
