ഈദ് പ്രമാണിച്ച് ഇന്ന് മുതൽ ഖത്തറിലെ 10 കേന്ദ്രങ്ങളിൽ ‘ഈദിയ’ എടിഎം സേവനം ലഭ്യമാകും. ഈദ് ദിവസങ്ങളിൽ ഉപഭോക്താക്കൾക്ക് 5, 10, 50, 100 റിയാൽ കറൻസികൾ മാത്രം പിൻവലിക്കുന്നതിന് വേണ്ടിയുള്ള എടിഎം സേവനമാണ് ‘ഈദിയ’. രാജ്യത്തെ മാൾ ഓഫ് ഖത്തർ, പ്ലേസ് വിൻഡം മാൾ, അൽ മിർഖബ് മാൾ, ദോഹ ഫെസ്റ്റിവൽ സിറ്റി, അൽ ഹസം മാൾ, അൽഖോർ മാൾ, അൽമീറ (തുമാമ, മൈതർ), അൽ വക്ര ഓൾഡ് സൂഖ്, ദോഹ വെസ്റ്റ് വാക്ക് എന്നിവിടങ്ങളിലാണ് ഈദിയ എടിഎമ്മുകൾ സ്ഥാപിച്ചിരിക്കുന്നത്.
ഇക്കഴിഞ്ഞ ഈദുൽ ഫിത്‌റിലാണ് ‘ഈദിയ’ എന്ന പേരിലുള്ള എടിഎമ്മിന് ഖത്തർ സെൻട്രൽ ബാങ്ക് തുടക്കമിട്ടത്. പെരുന്നാൾ നാളിൽ കുട്ടികൾക്ക് ഉൾപ്പെടെ പണവും സമ്മാനങ്ങളും നൽകുന്ന ഈദ് പൈതൃകം പ്രോത്സാഹിപ്പിക്കുന്നതിനാണ് ഈദിയ എടിഎം സേവനം നൽകുന്നതെന്ന് ഖത്തർ സെൻട്രൽ ബാങ്ക് വ്യക്തമാക്കി.
