ഓഫ് സീസണിൽ അധിക ബാഗേജ് നിരക്കിൽ വൻ ഇളവ് പ്രഖ്യാപിച്ച് എയർ ഇന്ത്യ എക്സ്പ്രസ്. കുവൈറ്റിൽ നിന്ന് നാട്ടിലേക്കുള്ള അധിക ബാഗേജ് നിരക്കിലാണ് എയർ ഇന്ത്യ എക്സ്പ്രസ് കുറവു വരുത്തിയത്. നിലവിൽ 10 കിലോ അധിക ബാഗേജിന് ഒരു ദീനാർ മാത്രമാണ് ഈടാക്കുന്നത്. 15 കിലോ അധിക ബാഗേജിന് 10 ദീനാറാണ് ഈടാക്കുക. എന്നാൽ ഡിസംബർ 11 വരെ യാത്ര ചെയ്യുന്നവർക്കും ടിക്കറ്റ് എടുക്കുന്നവർക്കും മാത്രമായിരിക്കും ഈ ഓഫർ. കുവൈറ്റിൽ നിന്നുള്ള യാത്രക്കു മാത്രമാണ് ഈ കുറവ്.
അതേസമയം കുവൈറ്റിൽ നിന്ന് നാട്ടിലേക്ക് നിലവിൽ 30 കിലോ ചെക്ക് ഇൻ ബാഗേജും ഏഴു കിലോ കാബിൻ ബാഗേജും സൗജന്യമാണ്. തിരിച്ച് 20 കിലോ ചെക്ക് ഇൻ ബാഗേജും ഏഴു കിലോ കാബിൻ ബാഗേജും സൗജന്യമായി കൊണ്ടുവരാം. ജൂലൈയിൽ സൗജന്യ ബാഗേജിന് പുറമെ കൂടുതലായി വരുന്ന അഞ്ചു കിലോയ്ക്ക് മൂന്ന് ദീനാർ, 10 കിലോക്ക് ആറു ദീനാർ, 15 കിലോക്ക് 12 ദീനാർ എന്നിങ്ങനെ നിരക്ക് കുറച്ചിരുന്നു. ഇതാണ് വീണ്ടും കുറച്ചത്. എന്നാലിപ്പോൾ ഓഫ് സീസണും യാത്രക്കാരുടെ കുറവും കണക്കിലെടുത്താണ് ബാഗേജ് നിരക്കിൽ കുറവു വരുത്തിയതെന്നാണ് സൂചന.
അതേസമയം ഓഫ് സീസണിൽ കഴിഞ്ഞ വർഷം സൗജന്യ ബാഗേജ് 30 കിലോ എന്നത് 40 കിലോ വരെയാണ് അനുവദിച്ചത്. കൂടാതെ ജൂണിൽ തിരക്കേറിയ സമയത്ത് 10 കിലോ അധിക ബാഗേജിന് 40 ദീനാർ വരെ ഉയർത്തിയിരുന്നു. അതിനു മുമ്പ് 10 കിലോക്ക് 14 ദീനാർ വരെ ആയിരുന്നു നിരക്ക്. ഇതാണ് ഇപ്പോൾ കുത്തനെ കുറച്ചത്.
