സിംഗപ്പൂർ എയർലൈൻസ് വിമാനം ആകാശച്ചുഴിയിൽ പെട്ട് ഒരു യാത്രക്കാരൻ മരിച്ച സംഭവത്തിന്റെ ഞെട്ടൽ ഇതുവരെ മാറിയിട്ടില്ല. വീണ്ടും അത്തരമൊരു വാർത്ത ഞെട്ടൽ ഉണ്ടാക്കുകയാണ്. ദോഹയിൽ നിന്നും ഡുബ്ലിനിലേക്ക് പറന്ന ഖത്തർ എയർവേസ് വിമാനമാണ് തൂർക്കിയക്ക് മുകളിൽ പറക്കവെ ആകാശച്ചുഴിയിൽ പെട്ടത്.
ആകാശത്ത് വിമാനം ആടിയുലഞ്ഞപ്പോൾ യാത്രക്കാരും കാബിൻ ക്രൂവും ഉൾപ്പെടെ 12പേർക്ക് പരിക്കേറ്റതായി ഡബ്ലിൻ വിമാനത്താവള അധികൃതർ അറിയിച്ചു. സംഭവത്തിനു ശേഷം ഖത്തർ എയർവേസ് ക്യൂ.ആർ 017 വിമാനം സുരക്ഷിതമായി ഡുബ്ലിൻ വിമാനത്താവളത്തിലിറങ്ങുകയും ചെയ്തു. അപകട വിവരം അറിഞ്ഞ വിമാനത്താവള അധികൃതർ വിമാനം ലാൻഡിങ്ങിന് എല്ലാ അടിയന്തര സജ്ജീകരണങ്ങളും ഒരുക്കിയിരുന്നതായി അറിയിച്ചു.
