10 വർഷങ്ങൾക്ക് ശേഷം വാണി വിശ്വനാഥ് സിനിമയിലേയ്ക്ക് തിരിച്ചെത്തുന്നു. വാണി വിശ്വനാഥും ശ്രീനാഥ് ഭാസിയും പ്രധാന വേഷത്തിൽ എത്തുന്ന ‘ആസാദി’ എന്ന ചിത്രത്തിലൂടെയാണ് താരം മലയാള സിനിമയിലേയ്ക്ക് മടങ്ങിവരുന്നത്. സിനിമയുടെ ക്യാരക്ടർ ടീസർ റിലീസ് ചെയ്തു.
ചിത്രത്തിലെ ഏഴ് പ്രധാന അഭിനേതാക്കളെ കേന്ദ്രീകരിച്ചാണ് ടീസർ പുറത്തിറക്കിയിരിക്കുന്നത്. ലിറ്റിൽ ക്രൂ ഫിലിംസിന്റെ ബാനറിൽ ഫൈസൽ രാജ നിർമ്മിക്കുന്ന ചിത്രം ജോ ജോർജ് ആണ് സംവിധാനം ചെയ്തിരിക്കുന്നത്. വാണി വിശ്വനാഥിനും ശ്രീനാഥ് ഭാസിക്കും പുറമെ ലാൽ, പ്രമുഖ ഡബ്ബിങ് താരം ശ്രീജ രവിയുടെ മകളായ രവീണ രവി, സൈജു കുറുപ്പ് തുടങ്ങിയ പ്രമുഖ താരങ്ങളാണ് അണിനിരക്കുന്നത്. ത്രില്ലർ ചിത്രത്തിന്റെ തിരക്കഥ രചിച്ചിരിക്കുന്നത് സാഗറാണ്.
രാജേഷ് ശർമ്മ, ബോബൻ സാമുവൽ, സാബു ആമി, ജിലു ജോസഫ്, അഭിരാം, ആന്റണി ഏലൂർ, അബിൻ ബിനോ എന്നിവരും ചിത്രത്തിലുണ്ട്. ചിത്രത്തിലെ ഗാനങ്ങൾ ഒരുക്കിയത് ഹരി നാരായണനും സംഗീതം വരുൺ ഉണ്ണിയുമാണ്.
