മിമിക്രി വേദികളിലൂടെ സിനിമയിലെത്തിയ താരമാണ് രമേശ് പിഷാരടി. നിരവധി സ്റ്റേജ് ഷോകളിൽ ഒറ്റയ്ക്ക് നിന്ന് വേദി കീഴടക്കുന്ന അപൂർവ്വം ചില താരങ്ങളിൽ ഒരാളാണ് നടൻ. സിനിമകളിലുടനീളം കോമഡിയും സഹനടനുമായെല്ലാം തിളങ്ങിയ രമേശ് പിഷാരടി സംവിധായകന്റെയും കുപ്പായം അണിഞ്ഞിരുന്നു. ജയറാമായിരുന്നു ആദ്യ ചിത്രത്തിലെ നായകൻ. ഇപ്പോഴിതാ അടുത്ത സിനിമ സംവിധാനം ചെയ്യാൻ ഒരുങ്ങുന്നുവെന്ന സന്തോഷം പങ്കുവച്ചിരിക്കുകയാണ് പിഷാരടി.
സോഷ്യൽ മീഡിയ വഴിയാണ് രമേശ് പിഷാരടി ഇക്കാര്യം അറിയിച്ചത്. സൗബിൻ ഷാഹിർ ആണ് ചിത്രത്തിൽ നായകനായെത്തുന്നത്. സന്തോഷ്‌ ഏച്ചിക്കാനം രചന നിർവഹിക്കുന്ന ചിത്രം നിർമിക്കുന്നത് ബാദുഷയുടെ നേതൃതൃത്വത്തിലുള്ള ബാദുഷ സിനിമാസ് ആണ്. സിനിമാ വിശേഷം പങ്കുവച്ചു കൊണ്ട് സൗബിനൊപ്പവും മറ്റ് അണിയറ പ്രവർത്തകർക്ക് ഒപ്പമുള്ളതുമായ ഫോട്ടോകൾ നടൻ സമൂഹ മാധ്യമത്തിൽ പങ്കുവച്ചിട്ടുണ്ട്.
ജയറാം ഏറെ വ്യത്യസ്തമായ കഥാപാത്രമായി എത്തിയ ചിത്രമായിരുന്നു ‘പഞ്ചവര്‍ണ്ണതത്ത’. ഇതായിരുന്നു രമേശ് പിഷാരടിയുടെ ആദ്യ ചിത്രം. കുഞ്ചാക്കോ ബോബനും ഈ ചിത്രത്തിൽ പ്രധാന വേഷത്തിൽ എത്തിയിരുന്നു. 2018ൽ ആയിരുന്നു ചിത്രത്തിന്റെ റിലീസ്. ശേഷം 2029ൽ മമ്മൂട്ടിയെ നായകനാക്കി ‘ഗാനഗന്ധര്‍വ്വന്‍’ എന്ന പേരിൽ പിഷാരടി സിനിമ സംവിധാനം ചെയ്തു. ചിത്രത്തിന്റെയും രചനയും സംവിധാനവും പിഷാരടി തന്നെയായിരുന്നു.
