മോഹൻലാൽ- ലിജോ ജോസ് പെല്ലിശ്ശേരി കൂട്ടുകെട്ടിൽ പിറക്കുന്ന ‘മലൈക്കോട്ടൈ വാലിബൻ’ ചിത്രത്തിന്റെ ടീസർ റിലീസ് ചെയ്തു. ‘കണ്ടതെല്ലാം പൊയ്, ഇനി കാണപ്പോകത് നിജം..’എന്ന ഡയലോഗാണ് ടീസറിൽ. ലാലേട്ടന്റെ തീ പാറുന്ന ഡയലോഗിലൂടെ ആവേശം ഇരട്ടിയാക്കി മലൈക്കോട്ടൈ വാലിബന്റെ ടീസർ കത്തികയറുകയാണ്.
ടീസർ റിലീസ് ചെയ്ത് ആദ്യ മണിക്കൂറിൽ തന്നെ കാഴ്ചക്കാരുടെ എണ്ണം മൂന്ന് ലക്ഷം കവിഞ്ഞു. മോഹൻലാലിന്റെ പീരിയഡ് ഡ്രാമയായ ‘മലൈക്കോട്ടൈ വാലിബൻ” ജോൺ ആൻഡ് മേരി ക്രിയേറ്റീവ്, സെഞ്ച്വറി ഫിലിംസ്, മാക്‌സ് ലാബ്, സരിഗമ എന്നിവർ ചേർന്നാണ് നിർമ്മിക്കുന്നത്. മോഹൻലാലിനൊപ്പമുള്ള യൂഡ്‌ലി ഫിലിംസിന്റെ ആദ്യ പ്രൊജക്ട് കൂടിയാണ് ‘മലൈക്കോട്ടൈ വാലിബൻ’.
ഛായാഗ്രഹണം മധു നീലകണ്ഠനും സംഗീതം പ്രശാന്ത് പിള്ളയുമാണ്. സൊനാലി കുൽക്കർണി, ഹരീഷ് പേരടി, ഡാനിഷ് സെയ്ത്, മനോജ് മോസസ്, കഥ നന്ദി, മണികണ്ഠൻ ആചാരി എന്നിവരും മറ്റ് ശ്രദ്ധേയമായ കഥാപാത്രങ്ങളെ അവതരിപ്പിക്കുന്ന ‘മലൈക്കോട്ടൈ വാലിബൻ’ 2024 ജനുവരി 25 ന് തിയേറ്ററുകളിലെത്തും. ലിജോയുടെ ശിഷ്യനും സംവിധായകനുമായ ടിനു പാപ്പച്ചനാണ് ചീഫ് അസോസിയേറ്റ് ഡയറക്ടർ. ജല്ലിക്കെട്ടിനുശേഷം സംഗീത സംവിധായകൻ പ്രശാന്ത് പിള്ള വീണ്ടും ലിജോ ചിത്രത്തിന്റെ ഭാഗമാകുന്നു എന്ന പ്രത്യേകത കൂടിയുണ്ട് ഈ ചിത്രത്തിന്.
