മലയാള സിനിമയിൽ ചെറിയ വേഷങ്ങളിലൂടെ ശ്രദ്ധേയനായ അരിസ്റ്റോ സുരേഷ് നായകനായി അരങ്ങേറ്റം കുറിക്കാനൊരുങ്ങുന്നു. വയലുങ്കൽ ഫിലിംസിൻ്റെ ബാനറിൽ പ്രമുഖ യുട്യൂബറും നിർമ്മാതാവും സംവിധായകനുമായ ജോബി വയലുങ്കൽ ഒരുക്കുന്ന രണ്ടാമത്തെ ചിത്രത്തിലാണ് അരിസ്റ്റോ സുരേഷ് നായക വേഷത്തിലെത്തുന്നത്.
നിവിൻ പോളിയുടെ ആക്ഷൻ ഹീറോ ബിജുവിലൂടെ സിനിമയിലെത്തിയ സുരേഷ് നിരവധി ചിത്രങ്ങളിൽ ഇതിനോടകം വേഷമിട്ടിട്ടുണ്ട്. ചിത്രത്തിന്റെ സംവിധാനം, നിർമ്മാണം, കഥ, തിരക്കഥ, സംഭാഷണം എന്നിവ നിർവ്വഹിക്കുന്നത് ജോബി വയലുങ്കലാണ്. കൂടാതെ സിനിമയിൽ ജോബിയും സുപ്രധാനമായ വേഷം കൈകാര്യം ചെയ്യുന്നുണ്ട്. സിനിമയുടെ ടൈറ്റിൽ ഉടൻ പ്രഖ്യാപിക്കുമെന്ന് അദ്ദേഹം വ്യക്തമാക്കി.
മലയാളത്തിലെ നിരവധി പ്രശസ്ത താരങ്ങൾ ചിത്രത്തിൽ അണിനിരക്കും. കൊല്ലം തുളസി, ബോബൻ ആലുംമൂടൻ, വിഷ്ണുപ്രസാദ്, യവനിക ഗോപാലകൃഷ്‌ണൻ, നടൻ സുരാജ് വെഞ്ഞാറമൂടിൻ്റെ ജ്യേഷ്‌ഠനായ സജി വെഞ്ഞാറമൂട്, ഷാജി മാവേലിക്കര, വിനോദ്, ഹരിശ്രീ മാർട്ടിൻ, സുമേഷ്, കൊല്ലം ഭാസി തുടങ്ങി നൂറിലേറെ താരങ്ങളാണ് ചിത്രത്തിൽ വേഷമിടുന്നത്.
