അതിഥിയായി വിളിച്ച ശേഷം തന്റെ ധാർമിക മൂല്യങ്ങൾ കോളേജിന് എതിരാണെന്ന് ചൂണ്ടിക്കാട്ടി പരിപാടി റദ്ദ് ചെയ്തതില്‍ പ്രതിഷേധം അറിയിച്ച് സംവിധായകന്‍ ജിയോ ബേബി. കോഴിക്കോട് ഫാറൂഖ് കോളജിലെ ഫിലിം ക്ലബ്ബുമായി ബന്ധപ്പെട്ട് നടത്താനിരുന്ന പരിപാടിയിലാണ് ജിയോ ബേബിയെ അതിഥിയായി ക്ഷണിച്ചിരുന്നത്.
അത് പ്രകാരം പരിപാടിയിൽ പങ്കെടുക്കാന്‍ കോഴിക്കോട് എത്തിയപ്പോഴായിരുന്നു പ്രോഗ്രാം റദ്ദാക്കിയ വിവരം കോളജ് അധികൃതര്‍ വിളിച്ചറിയിച്ചത് എന്ന് ജിയോ ബേബി സമൂഹമാധ്യമങ്ങളില്‍ പങ്കുവച്ച വീഡിയോയിലൂടെ പറഞ്ഞു. ഇതുമായി ബന്ധപ്പെട്ട് കോളേജിനെതിരെ നിയമ നടപടി സ്വീകരിക്കുമെന്നും അദ്ദേഹം വ്യക്തമാക്കി. വീഡിയോ നടി മാലാ പാർവതിയും പങ്കുവച്ചിട്ടുണ്ട്.
ഇൻസ്റ്റാഗ്രാമിൽ പങ്കുവച്ച വീഡിയോയിലെ വാക്കുകൾ
“നമസ്‌കാരം, ഞാന്‍ ജിയോ ബേബി. എനിക്കുണ്ടായ ഒരു മോശം അനുഭവത്തെക്കുറിച്ച് സംസാരിക്കുന്നതിന് വേണ്ടിയാണ് ഞാനിവിടെ വന്നത്. ഡിസംബര്‍ അഞ്ചിന് ഫാറൂഖ് കോളജ് ഫിലിം ക്ലബ്ബ് സംഘടിപ്പിക്കുന്ന ‘സബ്ടില്‍ പൊളിറ്റിക്‌സ് ഓഫ് പ്രസന്റ് ഡേ’ മലയാള സിനിമ എന്ന വിഷയവുമായി ബന്ധപ്പെട്ട പരിപാടിയിൽ പങ്കെടുക്കുന്നതിന് എന്നെ അവര്‍ ക്ഷണിച്ചിരുന്നു. അതനുസരിച്ച് അഞ്ചാം തിയതി രാവിലെ ഞാന്‍ കോഴിക്കോടെത്തി. അവിടെ എത്തിയതിന് ശേഷമാണ് ഈ പരിപാടി അവര്‍ റദ്ദാക്കിയെന്ന് ഞാന്‍ അറിയുന്നത്. ഇത് കോഡിനേറ്റ് ചെയ്യുന്ന ടീച്ചറായിരുന്നു എന്നെ വിളിച്ച് ഇക്കാര്യം അറിയിച്ചത്. അവര്‍ക്കും അത് വളരെ വേദനയുണ്ടായി. പക്ഷേ എന്താണ് കാരണം എന്ന് ചോദിച്ചപ്പോൾ വ്യക്തമായൊരു ഉത്തരം അവരുടെ ഭാഗത്തുനിന്നും ഉണ്ടായില്ല.
എന്നാൽ, സോഷ്യല്‍ മീഡിയയില്‍ പോസ്റ്റര്‍ വരെ റിലീസ് ചെയ്ത ഈ പരിപാടി പെട്ടെന്ന്‌ മാറ്റിവയ്ക്കാന്‍ കാരണമെന്താണ് എന്ന് അറിയാന്‍ കോളജ് പ്രിന്‍സിപ്പാളിന് ഞാനൊരു മെയില്‍ അയച്ചു. എന്താണ് എന്നെ മാറ്റി നിര്‍ത്തുവാനുള്ള കാരണമെന്നും മെയിലിലൂടെ ചോദിച്ചു. വാട്ട്‌സാപ്പിലും ബന്ധപ്പെട്ടു. പക്ഷേ ഇതുവരെ അതിന് മറുപടി ലഭിച്ചിട്ടില്ല. അതിന് ശേഷം ഈ വിഷയവുമായി ബന്ധപ്പെട്ട് ഫാറൂഖ് കോളജിലെ സ്റ്റുഡന്റ്‌സ് യൂണിയന്റെ ഒരു കത്ത് എനിക്ക് ലഭിച്ചു. അത് ഫോര്‍വേര്‍ഡ് ചെയ്ത് എനിക്ക് കിട്ടിയതായിരുന്നു.
‘ഫാറൂഖ് കോളജില്‍ പ്രവര്‍ത്തിച്ചു വരുന്ന ഫിലിം ക്ലബ്ബുമായി ബന്ധപ്പെട്ട് നാളെ 5.12.2023-ന് എത്തിച്ചേരുന്ന ഉദ്ഘാടകന്റെ പരാമര്‍ശങ്ങള്‍ കോളജിന്റെ ധാര്‍മിക മൂല്യങ്ങള്‍ക്ക് എതിരാണ്. ആയതിനാൽ പ്രസ്തുത പരിപാടിയുമായി ഫാറൂഖ് കോളജ് വിദ്യാര്‍ഥി യൂണിയന്‍ സഹകരിക്കുന്നതല്ല’. കത്തിൽ ഇങ്ങനെയായിരുന്നു ഉണ്ടായിരുന്നത്. എന്റെ ധാര്‍മിക മൂല്യങ്ങളാണ് സ്റ്റുഡന്റ്‌സ് യൂണിയന്‍ പ്രശ്നമായി പറയുന്നത്. മാനേജ്‌മെന്റ് എന്തുകൊണ്ട് ആ പരിപാടി കാന്‍സല്‍ ചെയ്തതെന്ന് കൂടി എനിക്ക് അറിയേണ്ടതുണ്ട്. കോഴിക്കോട് വരെ യാത്ര ചെയ്ത് തിരിച്ചുവരണമെങ്കില്‍ ഒരു ദിവസം വേണം. ഇത്രയും ദൂരം ഞാൻ യാത്ര ചെയ്തു. അതിനേക്കാളുപരി ഞാന്‍ അപമാനിതനായിട്ടുണ്ട്. ഇതിനെല്ലാമുള്ള ഉത്തരം എനിക്ക് കിട്ടണം. അതിനായി നിയമ നടപടി സ്വീകരിക്കും.”
View this post on Instagram
